САРДОРИ РАЁСАТИ МАОРИФИ ВИЛОЯТ: "ХАРИДИ ЛИБОСИ ЯГОНАИ МАКТАБӢ МАҶБУРӢ НЕСТ"

Ҳарчанд 28 муассисаи нави таълимӣ дар шаҳру навоҳӣ мавриди баҳрабардорӣ қарор дода шуд, аммо ин ҳамагӣ 15 фоизи иҷроиши Барномаи рушди муассисаҳои таълимии вилояти Хатлонро ташкил медиҳад. Ҳол он ки дар асоси барномаи мазкур бояд 231 муассисаи таълимӣ сохта ба истифода додоа мешуданд, - гуфт сардори Раёсати маорифи вилояти Хатлон Ашуралӣ Олимӣ дар нишасти хабарӣ. Инчунин, мавсуф илова кард, ки ҳамасола дар вилоят аз 20 то 27 ҳазор нафар хонандагон дар муассисаҳои таълимӣ зиёд мешаванд, ки яке аз сабабҳои асосии ба вуҷуд омадани норасоии ҷойҳои нишаст мебошад. илова бар ин, дар вилояти Хатлон 314 муассисаи садамавӣ мавҷуд мебошад, ки 44 адади он алакай бартараф карда шудаанд.

    Тибқи иттилои манбаъ, аз тарафи давлатҳои хориҷ дар ҳудуди вилоят 28 муассисаи таълимӣ давоми панҷ сол ба истифода дода шуд, ки аз ҷумлаи онҳо давлатҳои Чин, Олмон, Арабистони Саудӣ, Япония мебошанд. Қайд гардид, ки харидории либоси ягонаи мактабӣ иҷборӣ набуда, танҳо бо хоҳиш ва мусоидати кумитаи падару модарон ба роҳ монда мешавад.

 Дар рафти нишасти матбуотӣ оид ба шикояти омӯзгорон дар бораи гирифта натавонистани сафархарҷӣ ҳангоми гузаштан аз курси такмили ихтисос, ба талабот ҷавобгӯ набудани либоси худи омӯзгорон, тамаъҷӯй дар мактабҳо, сохтмони муассисаҳои нотамом дар ноҳияҳои Вахш, Кӯшониён, Левакант, ҳолати ногувори кӯдакистонҳо суолҳо азтарафи намояндагони расонаҳои хабарӣ пешниҳод гардид. 

 Гуфта шуд, ки дар вилояти Хатлон 70 муассисаи томактабии қисман садамавӣ мавҷуд мебошад, ки 15 адади онҳо шахсӣ ҳастанд. Дар ноҳияи ба номи Абдураҳмони Ҷомӣ муассисаи томактабии №4 амал мекунад, ки ба талабот ҷавобгӯ набуда, ҳатто ошхона надорад, вале ин муассиса мувақатӣ кӯшода шудааст. Дар ҳолати ҷойи мувофиқ пайдо гардидан ҷойяш иваз карда мешавад. Дар ноҳияи А.Ҷомӣ кӯдакон ҳамагӣ 3 фоиз ба муассисаҳои томактабӣ фаро гирифта шудаанд, ки ин нокифоя ва дар сатҳи паст мебошад. Аз ҳама баландтарин фарогирӣ дар шаҳри Бохтар мебошад, ки 22 фоизро ташкил медиҳад.

 А. Олимӣ афзуд, ки дар нимсолаи якуми соли равон 23 ҳолати даст ба худкушӣ задани ноболиғон ба қайд гирифта шудааст, ки нисбати соли гузашта 5 ҳолат зиёд мебошад. чунин ҳолат, бештар дар шаҳру ноҳияҳои Бохтар, Кӯшониён, Ёвон, Темурмалик нигаронкунанда мебошанд. Дар муассисаҳои таълимии вилояти Хатлон 62 душвортарбия мебошад, ки бо онҳо дар ҳамкорӣ бо корҳои дохила ва бахши ҳуқуқи кӯдак кор бурда истодаем, - изҳор дошт мавсуф.

         Тибқи таҳлилҳо дар панҷ моҳи соли ҷорӣ 51 ҳолати ба ҷинояткорӣ даст задани ноболиғон ба қайд гирифта шудааст, ки 33 нафарашон хонандагони мактабҳо мебошанд. Ин масъала зиёдтар дар шаҳру ноҳияҳои Вахш, Кӯшониён, Кӯлоб ва Абдураҳмони Ҷомӣ нигаронкунанда боқи мемонад. 

         Ғайр аз ин, суолҳо дар хусуси ба истироҳатгоҳҳо фарогирии омӯзгорон ва ба лагерҳои фароғатӣ – меҳнатӣ ҷалб кардани наврасон, имтиёз барои омӯзгорони ҷавон пешниҳод карда, ҷавобҳои қонеъкунанда гирифтанд.