Ҳушдор: чангу ғубор мешавад

Ба иттилои Агентии обуҳавошиносии мамлакат, 13-14 июл дар як қатор ноҳияҳои вилояти Хатлон, шаҳру ноҳияҳои тобеи ҷумҳурӣ ва шаҳри Душанбе бинобар тағйирёбии ҳаво, чангу ғубор дар назар аст.

Дар ин робита Кумитаи ҳолатҳои фавқулода ва мудофиаи гражданӣ ба сокинони мамлакат тавсия додааст, ки дар ҳолати чангу ғубор зуд-зуд бо латтаи намнок манзили истиқоматиашонро тоза кунанд. Аҳолии дар доманакӯҳҳо ва ноҳияҳои кӯҳӣ истиқоматкунанда, сокинон ва меҳмонони мамлакат дар ин рӯзҳо аз сафар ба минтақаҳои хатар, ҷамъоварии ҳезум, хӯроки чорво, гиёҳҳои шифобахш ва моҳидорӣ худдорӣ намоянд. Инчунин сайёҳоне, ки нақшаи сафар бо роҳҳои кӯҳӣ доранд, эҳтиёткор бошанд.

Беморони гирифтори касалиҳои диабети қанд, дилу раг ва гипертония ҳавои манзили худро пайваста тоза намуда, дар ҳолати зарурӣ пӯшидани ниқобҳои тиббиро фаромӯш насозанд.