НИГОҲИ ЭҲТИРОМ БА НОБИҒАИ САҲНАИ ҲУНАР

Муҳаррир: Суҳроби Рустам аз 15 май, Бахш: Матлабҳои охирин / Хабари рӯз / Хабарҳо, Боздид 198

Имрӯз, дар толори пуршукӯҳи Театри мусиқӣ-мазҳакавии ба номи Ато Муҳаммадҷонови шаҳри Бохтар, маросими гиромидошти хотираи нобиғаи ҳунари театр ва кинои тоҷик Аловуддин Абдуллозода баргузор гардид. Ин ҳамоиш на танҳо нишони эҳтиром ба шахсияти бузург, балки таҷдиди паймон бо арзишҳои волои фарҳангу ҳунар буд.

Дар ин рўзи пур аз эҳсоси ифтихор ва андӯҳ, пайвандону наздикон, ҳамкорони пешин, шогирдон ва мухлисони зиёди ин фарзанди содиқи саҳна гирд омаданд, то бо нигоҳи ормонӣ хотири устоди зиндаёдро пос доранд.

Ҳамоиш бо суханони Отахон Саидзода — роҳбари театр ва шогирди наздики устод оғоз ёфт. Ӯ дар суханронии худ бо эҳсоси баланди меҳру эҳтиром ёдовар шуд, ки Аловуддин Абдуллозода бо завқи нодири ҳунармандиаш на танҳо саҳнаро зинда мекард, балки қалбҳоро фатҳ менамуд.

Баъди суханрониҳои расмӣ, аҳли ҳунару адаб бо сурудҳо, порчаҳои шеърӣ ва ёдрасӣ аз нақшҳои барҷастаи устод хотираи ӯро гиромӣ доштанд. Мусиқӣ, сухан ва ашк ҳама дар ҳам омехта, фазои ботамкине офариданд, ки ҳар лаҳзаи он аз муҳаббат ба ҳунар ва поси хотири як шахсияти нотакрор дарак медод.

Дар идомаи чорабинӣ намоишномаи мазҳакавии “Зангирӣ дамгирӣ” ба саҳна гузошта шуд — як асари зебо ва пурмазмун, ки бахшида ба ёдбуди ин фарзанди соҳибмактаби фарҳанги тоҷик омода гардида, бо маҳорати баланди ҳунармандӣ ба мухлисон пешкаш шуд. Ин намоиш гӯё идомаи суханони ногуфтаи устод буд, бо ҳазл, бо андеша, бо дилсӯзӣ.

Ёдовар мешавем, ки Аловуддин Абдуллозода аз чеҳраҳои барҷастаи театру кинои тоҷик буда, бо сабки вижаи бозигарӣ, зеҳни тез ва зарофати суханҳояш дар дилу дидаи мардум ҷой гирифтааст. Ӯ аз зумраи он ҳунармандоне буд, ки на танҳо саҳнаро мешинохт, балки онро бо ҳастии хеш маънӣ мебахшид.

Маросими ёдбуд дар Театри шаҳри Бохтар собит кард, ки ҳунармандоне чун Аловуддин зиндаанд дар хотираҳо, дар саҳна, дар ҳар табассуми мухлисон.

ЁДИ Ӯ ҶОВИДОНА БОД!