НАФЪИ ГАРМХОНАҲО БА РУШДИ КИШОВАРЗӢ ВА ТАЪМИНИ БОЗОР БО МАҲСУЛОТИ ВАТАНӢ

Муҳаррир: Суҳроби Рустам аз 06 апрел, Бахш: Ҳокимияти давлати / Матлабҳои охирин / Хабари рӯз / Хабарҳо, Боздид 0

Дар шароити имрӯза, ки таъмини амнияти озуқаворӣ яке аз масъалаҳои муҳими рӯз ба ҳисоб меравад, рушди соҳаи кишоварзӣ ва истифодаи самараноки замин аҳамияти хосса касб намудааст. Хусусан, бунёд ва истифодаи гармхонаҳо ҳамчун як самти муҳими истеҳсоли маҳсулоти кишоварзӣ имкон медиҳад, ки дар тамоми фаслҳои сол аҳолӣ бо сабзавоти тару тоза таъмин гардад. Дар ин замина фаъолияти хоҷагии деҳқонии «Сафармад Алӣ», воқеъ дар деҳаи Лағмони шаҳри Кӯлоб намунаи ибрат ва таҷрибаи пешқадам арзёбӣ мешавад.

Хоҷагии мазкур тайи чанд соли охир бо роҳандозии гармхонаҳо дар масоҳати 0,30 гектар тавонистааст истеҳсоли мунтазами маҳсулоти кишоварзиро ба роҳ монад. Бо вуҷуди он ки масоҳати умумии заминҳои хоҷагӣ 1,70 гектарро ташкил медиҳад, истифодаи дуруст ва оқилонаи ҳар як қитъаи замин ба афзоиши истеҳсолот мусоидат намудааст. Маҳз тавассути ҷорӣ намудани усулҳои муосир ва таҷрибаи андӯхта, имрӯз хоҷагӣ ба яке аз таъминкунандагони асосии сабзавоти тару тоза барои аҳолии маҳаллӣ ва бозори шаҳри Кӯлоб табдил ёфтааст.

Дар гармхонаҳо асосан парвариши помидор, бодиринг ва қаламфури булғорӣ ба роҳ монда шудааст, ки талаботи бозор ба ин намуди маҳсулот дар тамоми фаслҳои сол баланд аст. Ҳамзамон, дар заминҳои кушод гулкарам, каду, сабзавоти гуногун ва маҳсулоти полезӣ, аз ҷумла тарбузу харбуза ва ҳандалак парвариш карда мешаванд. Парвариши қулфинай низ яке аз самтҳои сердаромади хоҷагӣ ба ҳисоб меравад, ки дар фасли баҳор ва аввали тобистон талаботи зиёд дорад.

Ба гуфтаи роҳбари хоҷагӣ, яке аз омилҳои асосии муваффақият ин омӯзиши таҷрибаи деҳқонони пешқадами кишвар ва татбиқи он дар амал мебошад. Бо истифода аз усулҳои парвариши зери плёнка, назорати ҳарорат ва намнокӣ дар гармхонаҳо ва инчунин интихоби тухмии хушсифат, имконият фароҳам омадааст, ки ҳосилнокӣ баланд бардошта шавад. Ин усулҳо махсусан дар шароити тағйирёбии иқлим, ки солҳои охир ба мушоҳида мерасад, хеле муҳим мебошанд.

Илова бар ин, дар хоҷагӣ ба масъалаи ҳифзи зироатҳо аз ҳашароти зараррасон таваҷҷуҳи ҷиддӣ зоҳир карда мешавад. Истифодаи усулҳои муосири мубориза, аз ҷумла усулҳои биологӣ ва кам намудани истифодаи маводи кимиёвӣ, имкон медиҳад, ки маҳсулоти истеҳсолшуда аз лиҳози экологӣ тоза ва барои истеъмол бехатар бошад. Ин омил дар ҷалби харидорон ва баланд бардоштани рақобатпазирии маҳсулот нақши муҳим мебозад.

Дар баробари рушди сабзавоткорӣ, роҳбарияти хоҷагӣ ба самти дигар - занбӯриасалпарварӣ низ таваҷҷуҳ зоҳир намудааст. Дар соли ҷорӣ парвариши 10 оилаи занбӯри асал ба роҳ монда шудааст. Ин иқдом на танҳо барои истеҳсоли асали табиӣ манфиатовар аст, балки барои гардолудшавии зироатҳо низ аҳамияти калон дорад. Тавре маълум аст, занбӯри асал дар раванди гардолудкунӣ нақши калидӣ дошта, ба зиёд шудани ҳосил мусоидат мекунад.

Яке аз дастовардҳои муҳими хоҷагӣ дар он аст, ки фаъолияти он танҳо ба истеҳсоли маҳсулот маҳдуд намешавад. Хоҷагӣ инчунин дар таъмини ҷойҳои корӣ барои аҳолии маҳаллӣ саҳми назаррас мегузорад. Бо таъсиси ҷойҳои нави корӣ, сатҳи бекорӣ дар маҳал коҳиш ёфта, даромади оилаҳо зиёд мегардад. Ин, дар навбати худ, ба беҳтар гардидани сатҳи зиндагии мардум мусоидат менамояд.

Бояд таъкид намуд, ки истифодаи гармхонаҳо имконият медиҳад, ки давраи истеҳсолот дароз карда шавад. Агар дар заминҳои кушод истеҳсолот бештар ба мавсим вобаста бошад, дар гармхонаҳо бошад, кишоварз метавонад дар фаслҳои гуногун маҳсулот ба даст орад. Ин омил барои таъмини доимии бозор бо маҳсулоти тару тоза ва коҳиш додани вобастагӣ аз воридот аҳамияти калон дорад.

Таҷрибаи хоҷагии «Сафармад Алӣ» нишон медиҳад, ки ҳатто дар масоҳати нисбатан маҳдуд бо истифодаи дурусти технология ва меҳнати софдилона метавон ба натиҷаҳои назаррас ноил гардид. Истифодаи тухмиҳои серҳосил, обёрии саривақтӣ, нигоҳубини дурусти зироатҳо ва ҷорӣ намудани таҷрибаҳои нав имконият медиҳанд, ки самаранокии истеҳсолот баланд бардошта шавад.

Имрӯз, ки рушди соҳаи кишоварзӣ яке аз самтҳои афзалиятноки сиёсати давлатӣ ба ҳисоб меравад, фаъолияти чунин хоҷагиҳо метавонад ҳамчун намунаи ибрат барои дигар кишоварзон хизмат намояд. Ҷорӣ намудани таҷрибаи онҳо дар дигар минтақаҳо метавонад ба афзоиши истеҳсоли маҳсулоти кишоварзӣ, таъмини амнияти озуқаворӣ ва рушди иқтисоди миллӣ мусоидат намояд.

Дар маҷмӯъ, фаъолияти хоҷагии мазкур гувоҳи он аст, ки меҳнати софдилона, истифодаи таҷрибаи пешқадам ва муносибати оқилона ба замин метавонад натиҷаҳои назаррас ба бор оварад. Гармхонаҳо ҳамчун яке аз воситаҳои муҳимми рушди соҳаи кишоварзӣ имрӯз нақши калидӣ дошта, метавонанд дар оянда низ ба пешрафти ин соҳа такони ҷиддӣ бахшанд.

Алишери Абдулмаҷид,

“ХАТЛОН”