ИФТИТОҲИ БУНГОҲИ ТИББӢ ДАР МАҲАЛЛАИ ФАЗЛ НАБӢ

2 март зимни сафари корӣ Сарвазири ҷумҳурӣ Қоҳир Расулзода ва раиси вилояти Хатлон Давлаталӣ Саид дар ноҳияи ноҳияи Мир Сайид Алии Ҳамадонӣ бунгоҳи тиббиро дар маҳаллаи Фазл Набии деҳоти Даштигуло мавриди истифода қарор доданд.

Бинои бунгоҳи тиббӣ иловатан ба нақшаи чорабиниҳо бахшида ба ҷашни 35-солагии Истиқлоли давлатии Ҷумҳурии Тоҷикистон бо маблағгузории Бонки умумиҷаҳонӣ аз ҷониби Лоиҳаи таҳкими устувории иҷтимоию иқтисодӣ дар Ҷумҳурии Тоҷикистон бо сифати баланд ва ҷавобгӯ ба талаботи замони муосир ба маблағи 985 ҳазор сомонӣ сохта шуда, бо таҷҳизоти замонавӣ муҷаҳҳаз гардонида шудааст.

Масоҳати умумии бино 83 метри мураббаъро ташкил дода, он аз се ҳуҷраи корӣ ва иншоотҳои ёрирасон иборат мебошад. Баъди ба истифода додани иншоот 4 нафар бо ҷойи кори доимӣ таъмин мегарданд.

Сарвазири мамлакат зимни ифтитоҳи бунгоҳ таъкид намуд, ки ба истифода супоридани чунин иншооти соҳаи тандурустӣ ба беҳтар гардидани сатҳи хизматрасонии тиббӣ ба сокинони маҳалла мусоидат намуда, заминаи мусоиди ҳифзи саломатии аҳолиро фароҳам меорад. Бунёди иншооти мазкур далели таваҷҷуҳи пайвастаи Роҳбарияти Олии мамлакат ба рушди соҳаи иҷтимоӣ ва баланд бардоштани сатҳи зиндагии мардум дар ноҳия мебошад.

Умарҷон Тошматов,

“ХАТЛОН”