Нақшаи обуна дар вилояти Хатлон 93,5 фоиз иҷро гардид

Тибқи иттилои Бобоев Шарифхон, директори Корхонаи фаръии КВД «Почтаи тоҷик» дар вилояти Хатлон, айни ҳол корхона дорои 22 маркази алоқаи почтавӣ буда, 219 нафар кормандон ба аҳолӣ хизмат мерасонанд.

Гуфта шуд, ки дар давраи ҳисоботӣ ҷиҳати таъмини обунаи саривақтии рӯзномаю маҷаллаҳо ҳамкорӣ бо зиёда аз 90 идораи нашрияҳо ба роҳ монда шуда, ба вилояти Хатлон беш аз 12 миллион нусха рӯзномаю маҷалла бо вазни умумии зиёда аз 302 тонна ворид гардидааст.

Ҳамзамон, гардиши муросилоти почтавӣ низ назаррас буда, зиёда аз 109 ҳазор адад мактубу баста қабул ва ирсол шудааст.

Иҷрои нақшаи супориши обуна ба рӯзномаю маҷаллаҳо барои соли 2026 то 30 январи соли ҷорӣ 93,5 фоизро ташкил дод. Роҳбарияти корхона ҷиҳати баланд бардоштани сифати хизматрасонӣ ва беҳтар намудани фаъолияти марказҳои алоқаи почтавӣ тадбирҳои зарурӣ меандешад.

Сабринаи САЙВАЛӢ

“Хатлон”