Шумораи нафақагирон дар Хатлон аз 300 ҳазор гузашт

Дар вилояти Хатлон шумораи нафақагирон нисбат ба соли гузашта 4,9 дарсад зиёд шудааст. Дар ин бора сардори Раёсати Агентии суғуртаи иҷтимоӣ ва нафақаи вилояти Хатлон Файзализода Қобилҷон зимни нишасти матбуотӣ иттилоъ дод.

Ба гуфтаи ӯ, дар соли 2025 нақшаи қисми даромади буҷети суғуртаи иҷтимоӣ ва нафақа дар вилоят аз ҳисоби андози иҷтимоӣ (25 ва 20 дарсад) дар ҳаҷми 1 миллиарду 313,4 миллион сомонӣ муқаррар гардида буд. Тибқи натиҷаҳои ҷамъбастшуда, ба буҷети суғуртаи иҷтимоӣ ва нафақа 1 миллиарду 436,4 миллион сомонӣ маблағ ворид гардидааст, ки ин 109,4 фоизи нақшаи пешбинишударо ташкил медиҳад.

Файзализода Қобилҷон таъкид намуд, ки тибқи таҳлилҳои муқоисавӣ, ба ҳолати 31 декабри соли 2025 шумораи умумии нафақагирон дар вилояти Хатлон 311 ҳазору 669 нафарро ташкил додааст, ки ин нишондиҳанда нисбат ба ҳамин давраи соли гузашта 14 ҳазору 474 нафар ё 4,9 дарсад зиёд мебошад.

Ҳамчунин иттилоъ дода шуд, ки дар соли 2025 ба сохторҳои маҳаллии Раёсати Агентӣ дар шаҳру ноҳияҳои вилоят 29 ҳазору 641 нафар шаҳрвандон бо пешниҳоди ариза ҷиҳати таъини нафақа муроҷиат намудаанд. Аз ин теъдод ба 28 ҳазору 628 нафар нафақа таъин гардида, аз ҷумла 18 ҳазору 750 нафар бо нафақаҳои суғуртавӣ ва 9878 нафар бо нафақаҳои давлатӣ таъмин шудаанд. Дар ҳамин давра 126 ариза рад гардида, 887 ариза мавриди баррасӣ қарор доранд.

Р. Мирзомиддин,

"Хатлон"