ТАҶЛИЛИ РӮЗИ ТЕАТР ДАР ХАТЛОН

Имрӯз, 4-уми ноябр, дар Театри вилоятии мусиқӣ-мазҳакавии ба номи Ато Муҳаммадҷонови шаҳри Бохтар бахшида ба Рӯзи театри тоҷик чорабинии идона таҳти унвони «Ҷашни ҳунар» баргузор гардид.

Чорабинӣ бо сухани ифтитоҳии муовини раиси вилояти Хатлон Анзурат Абдусаломзода оғоз ёфт. Зимни баромади худ ӯ аз саҳми муассир ва нақши муҳими аҳли ҳунар, бахусус ҳунармандони театри тоҷик ёдовар шуда, зикр намуд, ки санъати театр ҳамеша ойинаи зиндагии мардум буда, ҳунармандон паёмрасони зебоиву маърифатанд.

Дар идомаи чорабинӣ ҳунармандони театри вилоятӣ барои фаъолияти пурмаҳсул ва саҳми арзанда дар рушди фарҳанги ватанӣ бо ифтихорномаҳо қадрдонӣ гардиданд.

Қисми фарҳангии барнома бо иҷрои сурудҳои ватандӯстона, рақсу саҳначаҳои мазҳакавӣ ва порчаҳо аз намоишномаҳои театрии маъруф идома ёфт, ки бо кафкӯбиҳои гарми тамошобинон истиқбол гардид.