Дастаҳои футболи вилоят дар чӣ ҳоланд?

“ВАХШ” ДАЪВОИ ҚАҲРАМОНӢ ДОРАД

Нахуст шуруъ мекунем аз дастаи футболи “Вахш”-и шаҳри Бохтар. “Вахш” ягона дастае мебошад, ки дар 13 даври рақобатҳо ба бохт дучор нашудааст ва имсол даъвои қаҳрамониро дорад.

Дар ин равзанаи гузариш 3 футболбоз тарки даста карданд: Ҳусейн Нурматов, Саидшо Бозоров ва Худойдод Узоқов. Вале агар ба омори бозиҳо назар афканем, барои “Вахш” рафтани ин футболбозон фоҷиа нест. Хубтарини онҳо Ҳусейн Нурматов буд, ки ӯ ҳам дар 13 даври рақобатҳо танҳо дар 3 бозӣ дар ҳайати асосии даста бозӣ карда буд.

Метавон гуфт, ки “Вахш” ҳайати асосии худро пурра нигоҳ дошт ва ду футболбози пуртаҷрибаи дигарро ба даста ҷалб кард. Инҳо Сергей Сканян – собиқ футболбози “Хуҷанд” ва Костянтин Черний аз Украина мебошанд.

“РАВШАН”-И КӮЛОБ МЕТАВОНАД МУВАФФАҚ ШАВАД?

Агар дастаи “Вахш”-и шаҳри Бохтар дар танаффуси тобистона ҷамъомадҳои худро дар кишвар ва берун аз он доир карда бошад, дастаи “Равшан” ҳатто тамринҳои худро баргузор намекард. Чунин сару садоҳоро мухлисон дар шабакаҳои иҷтимоӣ ва коршиносони барномаи “90 дақиқа”-и ТВ “Варзиш” ба напардохтани маоши футболбозон рабт доданд.

Дар ин баробар, саҳифаи расмии даста аз рафтани Комрон Турсунов, Шаҳриёри Иноятулло ва Муҳаммадҷон Мираҳмадов хабар додааст.

Чунин ба назар мерасид, ки ҳоли “Равшан” дар идомаи мавсим табоҳ мешавад. Вале баъдан даста ҳайати худро чунон пурқувват кард, ки ҳамаро дар ҳайрат гузошт.

Салоҳиддин Иргашев, Сайёди Ковусшо, Саидисроил Саидов, Ҷамшед Муродов, Милош Милованович, Чуквубука Окоронкво ба сафи “Шерон”-и Кӯлоб пайваст шуданд. Ҳамин тариқ, “Равшан” дар даври 1/8-ниҳоии Ҷоми Тоҷикистон дастаи “Сардор” намоянда аз Лигаи якуми кишварро бо ҳисоби 4:1 шикаст дод. Вале савол ин аст, ки бе баргузории тамринҳо дар танаффуси тобистона “Равшан” метавонад дар Лигаи олӣ ба натиҷаҳои хуб ноил шавад? Инро вақт нишон медиҳад.

“ҲОСИЛОТ” ҚАҲРАМОНШАВ БУД...

Дастаи “Ҳосилот”-и ноҳияи Фархор, ки дар аввали мавсим ҳадафи қаҳрамон шудан дошт, баъди сипари шудани 13 даври рақобатҳо бо 15 имтиёз дар мавқеи 8-уми ҷадвали мусобиқа қарор дорад.

Дар равзанаи гузариши тобистона хадамоти матбуотии даста аз рафтани Хуршед Бекназаров, Ойбек Абдуғаффоров, Самуэл Офори, Азизбек Султонов ва Шавкати Ҳотам хабар додааст. Ба ҳайати даста Баракатулло Нигматуллозода, футболбози дастаи “Барқчӣ”, ба таври иҷора ҷалб шудааст.

Дар доираи бозиҳои даври 1/8-ниҳоии Ҷоми Тоҷикистон «Ҳосилот» бо дастаи «Истаравшан» рақобат мекунад. Ин бозӣ маълум мекунад, ки баъди гузариши тобистона «Ҳосилот» дар кадом вазъ қарор дорад.

“ҲУЛБУК” АЗ РАФТАНИ 11 БОЗИНГАР ХАБАР ДОД

Ҳайдар Сатторов, Бамаянгон Фраклин, Мақсуд Одинаев, Зафар Бердиев, Ҷамшед Муродов, Масрур Қиёмиддинов, Бахтиёр Чориев, Баҳризода Паҳлавон, Ҷафар Исмоилов, Зарҳалшо Акрамов, Фарзин Муродӣ ҷойи худро дар даста холӣ карданд. Аслан, чунин тағйироти зиёдро коршиносони соҳа қобили қабул намедонанд. Агар ба оғози мавсим назар андозем, “Ҳулбук” Чемпионатро хуб оғоз карда буд. Вале баъдан дар мавқеи поёнии ҷадвал қарор гирифт.

Дар ин баробар чанд футболбози пуртаҷриба ба ҳайати даста ҷалб шуданд. Мухтор Ортиқов, Умарҷон Шарипов, Сорбон Авғонов, Шавқати Ҳотам, Миқдод Розиқов, Хушбахт Миров ва Акбари Саид, Аддо Кваси ва Аддо Крис холигии дастаро пурра карданд.

Ногуфта намонад, ки футболбозони ноҳияи Восеъ бо шикаст додани дастаи “Парвоз” бо ҳисоби 1-0 роҳи худро ба даври 1/4-ниҳоии Ҷоми кишвар ҳамвор карданд.

ҲОЛИ ТАБОҲИ “ПАНҶШЕР” ТАБОҲТАР ШУД?

Шуруъ аз оғози мавсими имсола дастаи “Панҷшер” бозии бениҳоят заиф нишон медод. Дар рафту омади бозингарон дар равзанаи гузариши тобистона “Панҷшер” “рекорд”-и “Ҳулбук”-ро барҳам дод. Тибқи иттилое, ки ба мо дастрас аст, 13 футболбоз тарки даста карда, 13 футболбози дигар ба даста ҷалб шуданд. Дар ин баробар сармураббии тим иваз шуда, мутахассиси эронӣ ҷалб карда шуд.

Ҳусейнзода Фаррухӣ, директори КФ “Панҷшер” дар барномаи “90-дақиқа” иброз доштааст, ки тарки даста намудани бозингарон ба масъалаи молиявӣ рабт дорад. “Даста дар вазъияти ногувор қарор дорад. Барои фаъолияти даста мушкилоти норасоии маблағ мавҷуд аст, ки ҳалли ин масъала номаълум боқӣ мемонад. Шумораи зиёди футболбозон тарки даста карданд, ҳарчанд то охири мавсим бо мо қарордоди ҳамкорӣ доштанд. Вале агар ба футболбози мо пешниҳоди қарордод бо маблағи беҳтар бошад, мо монеа намешавем”.

1 август дастаи “Панҷшер”-ро боз як рақобати сангин интизор аст. “Панҷшер”-е, ки то ба ҳол шаҳди пирӯзиро начашидааст, бо дастаи “Вахш”, ки то ҳол ягона дастае мебошад, ки ба бохт дучор нагардидааст, андар майдони рақобат мешаванд.

P.S. Ба дастаҳои футболи вилоят дар марҳилаи дуюми Чемпионати Тоҷикистон ва бозиҳои Ҷоми кишвар барор мехоҳем.

Далер ИБОДУЛЛОЗОДА,

«Хатлон»