Кишти пахта дар «Сарзамини Левакант»: Қадами устувор ба сӯйи ҳосили фаровон

4 апрел дар доираи сафари корӣ раиси вилояти Хатлон Давлаталӣ Саид бо фаъолияти Кооперативи тиҷоратии "Сарзамини Левакант" дар шаҳри Левакант аз наздик шинос шуда, расман ба оғози кишти пунбадона оғоз бахшид.

Тибқи иттилоъ, кооперативи мазкур дорои 232 гектар замин буда, имсол тибқи нақша пурра барои кишти пахта истифода мешавад. Хоҷагидорон бо пайгирии таҷрибаи пешрафтаи кишоварзӣ, ният доранд тухмиҳои хушсифати австралиро бо усули дуқатора кишт намоянд.

Соли гузашта хоҷагидорон аз ин заминҳо то 30-сентнерӣ ҳосил ҷамъоварӣ карданд ва имсол бо истифода аз усулҳои муосири агротехникӣ умед доранд ҳосилнокиро боз ҳам баланд бардоранд.

Раиси вилояти Хатлон зимни суҳбат бо саҳмдорони кооперативи мазкур ба истифодаи самараноки заминҳо таъкид намуда, барои ба роҳ мондани кишти пунбадона бо риояи меъёрҳои агротехникӣ тавсияҳои муфид дод.

Қобили зикр аст, ки дар асоси дастуру супоришҳои Президенти мамлакат муҳтарам Эмомалӣ Раҳмон, ки дар ҷаласаи васеи ҳукумат садо доданд, имсол дар вилояти Хатлон дар масоҳати 124,5 ҳазор гектар пунбадона кишт карда мешавад. Аз ин шумора, 41 ҳазор гектар бо усули нави зери плёнка кишт хоҳад шуд.