НАВРӮЗИ АҶАМ ДАР ТЕМУРМАЛИК ВА ФАРХОР БО ШУКУҲИ ХОС ТАҶЛИЛ ГАРДИД

Бо мақсади эҳёи анъанаву суннатҳои аҷдодӣ ва қадр кардани арзишҳои фарҳангӣ, Наврӯзи байналмилалӣ – Наврӯзи Аҷам дар ноҳияҳои Темурмалик ва Фархор бо ҷалолу шукӯҳ ва муҳити идона таҷлил гардид.

Дар ин рӯзҳои пурнишот ва шодмон, мардуми фарҳангпарвари ноҳияҳои Темурмалик ва Фархор Наврӯзро ҳамчун ҷашни ояндасозии нав ва баробарӣ, бо ифтихор ва эҳсоси ватандӯстӣ истиқбол карданд.

Дар маркази ноҳияҳои мазкур барномаҳои фарҳангӣ ва намоишҳои ҳунарҳои мардумӣ, маҳсулоти кишоварзӣ ва дастовардҳои ташкилоту идораҳо ташкил гардиданд, ки бо дастархонҳои идонаи "Ҳафтшин" ва "Ҳафтсин", рамзи таассуроти наврӯзии аҷдодон ороста шуда буданд.

Дар Темурмалик, маросими идона бо намоиши маҳсули ҳунармандон ва барномаҳои фарҳангӣ, ки бо иштироки фаъоли дастаҳои ҳунарии маҳаллӣ ва наврасон гузаронида шуд, фазои ҷашнро болида намуд. Суруду рақсҳои миллӣ, шеърҳои наврӯзӣ ва саҳнаҳои мавзуӣ рамзи аслии Наврӯзро ба намоиш гузоштанд.

Дар Фархор бошад, таҷлили Наврӯз бо чорабинии анъанавии суманакпазӣ, гӯштин ва чорабиниҳои варзишии фароғатӣ ҷараён гирифт. Занону духтарон бо нияти барору хушҳолӣ дар гирди деги суманак ҷамъ омада, бо оҳангҳои миллӣ ва дуоҳои нек, фазои ҷашниро боз ҳам зебо гардониданд.

Раисони ноҳияҳо зимни суханронӣ таъкид карданд, ки Наврӯз, воқеан ҳам аз муборактарину фархундатарин ҷашнҳои миллии мо тоҷикон ва дигар мардумони ҳавзаи Наврӯз ба ҳисоб рафта, аз замонҳои қадим то ба имрӯз бо ғояҳои олии башардӯстонаи хеш – дӯстиву рафоқат, ҳамкориву ҳамбастагӣ, созандагиву ободкорӣ, инсондӯстиву хайрхоҳӣ ва шукргузорӣ аз зебоиву неъматҳои фаровони табиат мардумро гирди ҳам меорад. Он ҳамчун шоҳпуле аз қаъри асрҳо гузашта, ормону омоли ниёгон ва ҳадафҳои наҷиби созандагии имрӯзу ояндаи моро ба ҳам мепайвандад ва чун муждаи рӯзи нав симои маънавӣ, сиришти ахлоқӣ ва суннатҳои деринаи халқи тоҷикро бо арзишҳои волои умумибашарӣ ҳамоҳанг месозад.

Таҷлили Наврӯзи Аҷам дар ин ноҳияҳо бори дигар собит намуд, ки Наврӯз на танҳо як ҷашни миллӣ, балки рукни муҳими тавсеаи ваҳдати миллӣ ва тарбияи насли худшинос ва худогоҳ мебошад.

Алишери АБДУЛМАҶИД

“ХАТЛОН”