НАВРӮЗИ АҶАМ ДАР БАЛҶУВОН ВА ХОВАЛИНГ БО ШУКУҲИ ХОС ТАҶЛИЛ ГАРДИД

Муҳаррир: Суҳроби Рустам аз 23 март, Бахш: Ҳокимияти давлати / Матлабҳои охирин / Хабари рӯз / Хабарҳо, Боздид 47

Бо мақсади гиромидошти арзишҳои миллию фарҳангӣ ва эҳёи анъанаву суннатҳои аҷдодӣ, Наврӯзи байналмилалӣ – Наврӯзи Аҷам дар ноҳияҳои куҳистонии Балҷувон ва Ховалинг бо шукуҳу шаҳомати хоса таҷлил гардид.

Дар ин рӯзҳои пурнишот мардуми сарбаланди Балҷувон ва Ховалинг бо рӯҳияи баланди ватандӯстӣ, ифтихори миллӣ ва меҳру муҳаббат ба фарҳанги аҷдодӣ Наврӯзро ҳамчун ҷашни ваҳдату навсозӣ истиқбол гирифтанд.

Дар маркази ноҳияҳои мазкур намоиши ҳунарҳои мардумӣ, маҳсулоти кишоварзӣ ва дастовардҳои хонандагону омӯзгорон баргузор гардида, бо дастархонҳои идонаи "Ҳафтшин" ва "Ҳафтсин", ки аз анъанаҳои бостонии Наврӯзӣ маншаъ мегиранд, ороста шуданд.

Дар Балҷувон, маросими идона бо намоиши маҳсули ҳунармандон ва барномаи фарҳангии бошукуҳ, ки бо иштироки фаъоли дастаҳои ҳунарии маҳаллӣ, наврасон ва омӯзгорон доир гардид, рӯҳияи ҷашнро боло бурд. Суруду рақсҳои миллӣ, шеърҳои наврӯзӣ ва саҳнаҳои мавзуӣ симои асили ҷашни Наврӯзро таҷассум намуданд.

Дар Ховалинг бошад, таҷлили Наврӯз бо баргузории суманакпазии анъанавӣ, гӯштингирӣ, чорабиниҳои варзишӣ ва намоиши маҳсулоти хоҷагиҳои деҳқонӣ ҷараён гирифт. Занону духтарон бо нияти хайру баракат дар гирди деги суманак ҷамъ омада, бо оҳангҳои миллӣ ва дуоҳои нек фазои ҷашниро боз ҳам зебо гардониданд.

Раисони ноҳияҳо зимни суханронӣ Наврӯзро ҳамчун рамзи эҳёи табиат, ҳамдилию ҳамбастагӣ ва худогоҳии миллӣ арзёбӣ намуда, ба аҳолӣ баҳори ободию осудагӣ, дастовардҳои тоза ва соле пур аз файзу баракат таманно карданд.

Таҷлили Наврӯзи Аҷам дар ин ноҳияҳои куҳистон бори дигар собит сохт, ки Наврӯз на танҳо як ҷашни миллӣ, балки рукни муҳими таҳкими ваҳдати миллӣ ва тарбияи насли худшиносу худогоҳ мебошад.

Алишери АБДУЛМАҶИД,

“ХАТЛОН”