Раиси вилоят аз бахши кишоварзии Вахш дидан кард

Раиси вилояти Хатлон Давлаталӣ Саид ва вазири кишоварзии ҷумҳурӣ Қурбон Ҳакимзода дар доираи сафари корӣ аз фаъолияти кишоварзони ноҳияи Вахш шиносоӣ пайдо намуда, дар Ҷамоати деҳоти “Рӯдакӣ”-и ноҳия аз кооперативи тиҷоратӣ-тухмипарварии "Нуфузи Вахш" дидан намуданд. Дар ин бора шуъбаи иттилоотиву таҳлилии дастгоҳи раиси вилояти Хатлон хабар медиҳад.

Ба қавли манбаъ, кооперативи мазкур дорои 54 гектар замини корами обӣ буда, дар майдони 3 гектари он картошка кишт намуда, дар арафаи анҷомёбӣ қарор дорад. Инчунин, хоҷагидор имсол дар майдони 46 гектар кишти пунбадона мегузаронанд.

Раиси вилоят Давлаталӣ Саид зикр дошт, ки дар низоми иқтисодии минтақа бахши кишоварзӣ афзалияти хоса дорад. Аз ин рӯ, ба масъулони ноҳиявӣ дастур дод, ки ба бахшҳои алоҳидаи соҳаи кишоварзӣ, аз ҷумла картошкапарварӣ диққати аввалиндараҷа зоҳир карда шавад.

“Хатлон”