Наврӯзи байналмилалӣ дар Хатлон бо шаҳомати хос таҷлил мешавад

Ҷашни  байналмилалии  Наврӯз  имсол  дар  шаҳри  Бохтар  бо шаҳомати  хос  ва  баргузории  барномаи  рангини театрикунонидашуда таҷлил мешавад. Дар ин хусус қарори дахлдори раиси вилояти Хатлон Давлаталӣ Саид ба имзо расид.

Дар  арафа  ва  рӯзҳои  Иди  байналмилалии  Наврӯз  дар  вилояти  Хатлон  якчанд  чорабинӣ,  аз  ҷумла  ҳашарҳои  дастаҷамъона,  Фестивали вилоятӣ таҳти унвони “Либоси миллӣ – осори тамаддуни ҷаҳон”, аксияҳои тарғиботии “Тоҷикона мепӯшем”, “Ин ватанро мо – ҷавонон сабзу хуррам мекунем”, “Зебо ватан дорам”, гузоштани ангораҳои наврӯзӣ дар майдону гулгаштҳо, ташкили намоиши “Файзи Наврӯз” бо дастовардҳои кишоварзӣ, саноатӣ, ҳунарҳои мардумӣ, оростани дастархони “Ҳафтсин” ва “Ҳафтшин”, ҳаннодӣ  ва  таомҳои  миллӣ,  баргузории  маҳфилҳои  наврӯзӣ  бо  даъвати олимону  адибон  дар  шаҳру  ноҳияҳо  ва  ташкилоту  муассисаҳо,  ташкили мусобиқаҳои варзишӣ, аз қабили гӯштини миллӣ, чавгонбозӣ, дастхобонӣ, бандкашӣ, шоҳмот, консертҳои идона бахшида ба таҷлили Иди байналмилалии Наврӯз ва дигар барномаҳои фарҳангӣ баргузор карда мешаванд.

Ёдовар мешавем, ки ҳамасола дар қаламрави Тоҷикистон Иди байналмилалии Наврӯз дар сатҳи баланд ва бошукуҳ таҷлил гардида, дар доираи он чорабиниҳои мухталифи фарҳангию фароғатӣ, илмию амалӣ ва оммавию  варзишӣ,  аз  қабили  корвони  шодиёнаи  наврӯзӣ,  барномаи  рангини театрӣ, барномаҳои консертӣ дар боғҳои фарҳангу фароғатӣ бо шаҳомати хосса доир мегарданд.