ДАВЛАТАЛӢ САИД: "ҲОСИЛИ "ТИЛЛОИ САФЕД" БОЯД ТАЛАФ НАЁБАД"

Муҳаррир: Суҳроби Рустам аз 01 ноябр, Бахш: Ҳокимияти давлати / Слайдер / Матлабҳои охирин / Хабари рӯз / Арсаи кишоварзӣ / Хабарҳо, Боздид 558

Дар маҷлисгоҳи Мақомоти иҷроияи ҳокимияти давлатии вилояти Хатлон таҳти раёсати раиси вилоят Давлаталӣ Саид ҷаласаи корӣ оид ба қабул ва коркарди пахтаи ҳосили соли 2023 ва омодагии корхонаҳои коркарди пахтаи шаҳру ноҳияҳои вилоят баргузор гардид.

Дар ҷаласа муовини якум, муовинони раиси вилоят, прокурори вилоят, роҳбарони баъзе ташкилоту муассисаҳои вилоятӣ, раисони шаҳру ноҳияҳои пахтакори вилоят, сардори нозироти андоз, роҳбарони корхонаҳои пахтатозакунӣ ва дигар масъулон иштирок намуданд.

Дар ҷаласа як масъала – “Фаъолияти корхонаҳои коркарди пахта ва коргоҳҳои хурди пахтатозакунии вилоят аз ҳисоби ҳосили соли 2023, омодагии корхонаҳои пахтатозакунӣ ба коркарди пахтаи соли 2023 ва роҳҳои пешгирии фаъолияти номуносиби корхонаҳои хурди пахтатозакунӣ, ворид намудани ҳаҷми воқеии истеҳсол ва коркарди пахта ба ҳисоби оморӣ, шаклҳои дурусти андозбандӣ, назорати механизми ҷамъоварии пахта то коркарди ниҳоии он” мавриди баррасӣ қарор гирифт.

Қайд гардид, ки мувофиқи омори расмӣ, соли 2023 кишоварзони вилоят дар майдони 119 494 гектар (бо назардошти ченаки санҷишӣ) кишти пахтаро ба роҳ монда, мувофиқи ҳосили интизории биологӣ (апробатсия) аз ин майдон бояд наздики 300 000 тонна пахта (баробар ба 103 фоизи дурнамо) ҷамъоварӣ карда шавад.

Ба ҳолати 31 октябр аз ҷониби корхонаҳои пахтатозакунӣ 187 731,7 тонна пахта қабул гардидааст, ки ин нишондиҳанда ҳамагӣ 65,2 фоизи дурнаморо ташкил медиҳад.

Сардори Сарраёсати омори вилоят Қурбон Ҳакимзода оид ба фаро гирифтани пахтаи истеҳсолкардаи деҳқон, қабул ва коркарди пахта, роҳ надодан ба ҳисоботи нодуруст, инчунин сардорони Раёсатҳои андоз ва андозсупорандагони азими вилоят С. Раҷабзода ва З. Каримзода оид ба тартиби андозбандии коркарди пахта, ҳолати воқеии пардохтпазирии маблағи андоз аз ҷониби корхонаҳои хурди пахтатозакунӣ, роҳҳои пешгирии ҳолатҳои ғайриқонунии коркард ва қочоқи пахта ва прокурори вилояти Хатлон А. Раҳимзода оид ба роҳҳои назорати механизми ҷамъоварии пахта то коркарди ниҳоии он ва пешгирии қонуншиканӣ дар самти баҳисобгирии оморӣ суханронӣ намуданд.

Сипас, ахбори муовини якуми раиси вилояти Хатлон Амонулло Салимзода вобаста ба ҳолати воқеии ҷамъоварӣ ва қабули пахта аз ҷониби хоҷагиҳои пахтакор ва қабули он ба корхонаҳои коркард шунида шуд.

Сарраёсати омори вилоят, раёсатҳои андоз, назорати давлатии энергетикии вилоят, марказҳои стандартизатсия, метрология, сертификатсия ва назорати савдои вилоят вазифадор карда шуданд, ки вобаста ба қабул, коркард ва интиқоли пахта аз ҷониби корхонаҳои коркард аз рӯйи талаботи меъёрҳои пешбинишуда ҷиҳати таъмини тавозуни ҳаракати пахта тадбирҳои судманд андешанд.

Ҳамчунин, раиси вилоят Давлаталӣ Саид аз он изҳори нигаронӣ намуд, ки новобаста ба он ки мавсими ҷамъоварии пахта айни замон аз 58 корхонаи пахтатозакунии шаҳру ноҳияҳо ҳамагӣ 8 корхона бо гузаронидани корҳои таъмирӣ ва имкониятҳои молиявӣ қабули пахтаро дар сатҳи зиёда аз 5000 тонна ба роҳ монда, 17 корхона ҳаҷми қабули пахтаро то 1000 тонна нишон додаанд, ки фоидапазирии чунин корхонаҳо аз нигоҳи иқтисодӣ ҷавобгӯ намебошад.

Қобили зикр аст, ки имсол кишоварзони вилоят дар майдони 119 494 гектар навъҳои гуногуни пахтаро кишт намудаанд. Дар натиҷаи заҳмати деҳқонон майдонҳои пахтазор хуб нашъунамо ёфта, дар давраи ҳосилбандӣ қарор доранд. Мутобиқи маълумоти мутахассисон, ҳосили интизорӣ ва биологии пахта қаноатбахш арзёбӣ гардида, дар баъзе ноҳияҳо ҳосили зинаи якуми пахта ба чиниш расидааст.

- Имсол дар мавсими ҷамъоварӣ ва ба корхонаҳои коркард супоридани пахта як қатор камбудиву норасоиҳо, аз ҷумла бо нархи паст харидорӣ намудан ва сари вақт напардохтани маблағи он норозигии деҳқононро ба миён овард, - афзуд раиси вилоят Давлаталӣ Саид ва ба шахсони масъул супориш дод, ки бо ташкилотҳои соҳавӣ масъалаи маблағгузории ҳосили имсола омӯхта ва ҳал карда шавад.

Дар фароварди ҷаласаи корӣ раиси вилояти Хатлон ҳамчунин ҷиҳати беталаф ҷамъоварӣ намудани ҳосили пахта, ба роҳ мондани назорати дурусти механизми ҷамъоварии пахта ва коркарди он ба ниҳодҳои дахлдлор дастуру супоришҳои мушаххас дод.

http://khatlon-ruznoma.tj/