ДАР ВИЛОЯТИ ХАТЛОН 7 МАРКАЗИ НАВИ ИТТИЛООТИИ САЙЁҲӢ ТАЪСИС ЁФТ

Баҳри тарғибу ташвиқи имкониятҳои сайёҳии вилояти Хатлон ва ба сайёҳон дастрас будани маълумот оид ба мавзеъҳои таърихию тамошобоб дар ҳафт ноҳияи вилояти Хатлон марказ ва нуқтаҳои иттилоотии сайёҳӣ таъсис дода шуд.

Дилшод Шоҳзода, мудири шуъбаи рушди сайёҳии Мақомоти иҷроияи ҳокимияти давлатии вилояти Хатлон, зимни тасдиқи ин хабар ба рӯзномаи "Хатлон" гуфт, ки ин иқдом тибқи дастуру супоришҳои раиси вилояти Хатлон Давлаталӣ Саид дар ноҳияҳои Кӯшониён, Абдураҳмони Ҷомӣ, Ёвон, Хуросон, Вахш, Муъминобод ва Балҷувон роҳандозӣ шудааст.

Қобили зикр аст, ки то имрӯз дар вилояти Хатлон 21 маркази иттилоотии сайёҳӣ ба алоқамандони гардишгарӣ хизмат мерасонанд.

Дар ҳудуди Хатлонзамин 931 ёдгориву мавзеъҳои таърихӣ-фарҳангӣ, бостонӣ ва монументалӣ, 116 меҳмонхона, 139 мавзеи сайёҳӣ, 217 истироҳатгоҳу осоишгоҳ, 139 тарабхона, 45 осорхона, 19 ширкати сайёҳӣ, 128 чойхона, 368 банкомати хизматрасониҳои бонкӣ, 50 адад ҳомстей ва гестхаусҳо, 67 мағозаи фурӯши армуғонҳо, 115 зиёратгоҳ, 45 боғи фарҳангӣ-фароғатӣ ва гулгаштҳо, 80 адад ишораи сарироҳӣ мавҷуданд.