САФАРИ КОРИИ РАИСИ ВИЛОЯТ ДАВЛАТАЛӢ САИД БА НАВОҲИИ ҶАЛОЛИДДИНИ БАЛХӢ, ДӮСТӢ ВА ҚУБОДИЁН

Раиси вилояти Хатлон Давлаталӣ Саид ба ноҳияҳои Ҷалолиддини Балхӣ, Дӯстӣ ва Қубодиён сафари корӣ анҷом дод.

Раиси вилоят нахуст аз хоҷагии деҳқонии “Сафо”, воқеъ дар Ҷамоати деҳоти Золи Зар ноҳияи Ҷ. Балхӣ боздид намуд. Хоҷагии деҳқонии “Сафо” наздики 4 гектар заминро дар ихтиёр дошта, аз ин дар майдони 2,71 гектар замин боғи меваҳои гуногун, илова ба ин, дар қитъаҳои боқимонда кишти дигар зироат, аз ҷумла пахта, картошка, ғалладонагиҳо, полезиро ба роҳ мондааст. Раиси вилоят зимни боздид аз хоҷагии мазкур бо фаъолияти хоҷагидорон шинос шуда, ҷиҳати боз ҳам тақвият бахшидани корҳои саҳроӣ, истифодаи оқилонаву пурсамари замин, аз як замин бардоштани 2-3 ҳосил дастурҳои муфид пешниҳод намуд.

Боздиди раиси вилоят Давлаталӣ Саид дар ноҳияи Дӯстӣ аз хоҷагии деҳқонии “Юнус-Ш” оғоз гардид. Самти асосии фаъолияти хоҷагии мазкур ба боғдорӣ нигаронида шуда, дар як маврид хоҷагидорон барои таъмини эҳтиёҷоти рӯзгори худ ва таъмини бозори истеъмолӣ ғалладонагиҳо, ҷав, сабзиро кишт ва парвариш мекунанд.

Иттилоъ дода шуд, ки масоҳати умумии замини хоҷагӣ 7 гектарро дар бар мегирад ва аз ин ҳисоб 3 гектари онро боғи анор ташкил медиҳад.

Раиси вилоят аз анорбоғи хоҷагӣ дидан намуд ва аз хоҷагидорон даъват ба амал овард, ки нигоҳубини боғро хуб ба роҳ монда, аз қитъаҳои дохили боғ низ пурсамар истифода баранд.

Дар ноҳияи Дӯстӣ раиси вилоят Давлаталӣ Саид ҳамчунин бо вазъи фаъолияти пойгоҳи обкашии рақами 1 дидан намуд. Лозим ба зикр аст, ки қисмати зиёди заминҳои кишоварзӣ дар ҳудуди ҷамоатҳои шаҳраку деҳоти ноҳияи Дӯстӣ тавассути пойгоҳҳои обрасон обёрӣ мегарданд ва таъмин намудани фаъолияти назарраси пойгоҳҳо ба манфиати хоҷагидорон буда, роҳбарияти мақомоти иҷроия, масъулини соҳа дар ин самт пайваста тадбирандешӣ мекунанд.

Дар ин рӯз роҳбарияти мақомоти иҷроияи ҳокимияти давлатии вилояти Хатлон бо ҳолати нашъунамои пахта дар ҶДММ “Ҷунтай Хатлон Син-Силу” шиносоӣ пайдо намуданд. Мавриди зикр аст, ки ҷамъияти мазкур дар ихтиёри худ 3390 гектар замин дошта, таваҷҷуҳи асосӣ ба кишт, парвариш ва истеҳсоли пахта дорад. Чуноне иттилоъ дода шуд, соли қаблӣ аз ҳар як гектар замин 40-45-сентнерӣ ҳосил ба даст оварда, имсол низ бо мақсади ба даст овардани ҳосили фаровон ҳадафмандона заҳмат мекашанд.

Раиси вилоят Давлаталӣ Саид зимни сафари корӣ ба ноҳияи Қубодиён аз хоҷагии деҳқонии “Муродбек” боздид намуд. Хоҷагии мазкур дар ихтиёри худ 16 гектар замин дошта, саҳмдоронаш ба кишт ва парвариши зироати гуногуни ба иқлими маҳал мутобиқ машғуланд.

Тавре мушоҳида гардид, нашъунамои зироати кишташуда хуб буда, деҳқонон барои ба даст овардани ҳосили фаровони маҳсулот аз тухмиҳои аълосифат истифода намуда, агротехникаи парвариши зироатро риоя мекунанд.

Дар иртибот ба таъмин намудани дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки дар мулоқот бо роҳбарон ва фаъолони вилоят баён гардиданд, ҷиҳати пурсамару оқилона истифода бурдани заминҳои кишоварзӣ, баланд бардоштани боздеҳи замин, захираи маводи ғизоӣ дар шаҳру ноҳияҳои вилояти Хатлон масъулини соҳа ва кишоварзон тадбирҳои муҳимро амалӣ мекунанд. Ин иқдом на танҳо дар афзун гаштани ҳаҷми истеҳсоли маҳсулот, таъмини амнияти озуқаворӣ дар кишвар мусоидат мекунад, балки дар умум боиси беҳдошти рӯзгори сокинон мегардад, ки ҳадаф аз дастуру супоришҳои бамавриду дурандешонаи Пешвои муаззами миллат низ ҳамин маъниро ифода мекунад.