80 қонуншиканӣ самти танзими ҷашну маросим

Тайи се моҳи аввали соли ҷорӣ дар шаҳру ноҳияҳои вилояти Хатлон 13926 ҷашну маъракаҳо баргузор гардидааст. Дар ин бора ба рӯзномаи «Хатлон» мудири шуъбаи танзими анъана ва ҷашну маросими Мақомоти иҷроияи ҳокимияти давлатии вилояти Хатлон Муҳаммадӣ Шарифзода иттилоъ дод.

Ба қавли манбаъ, дар ин давра ҳамагӣ 80 қонуншиканӣ вобаста ба танзими анъана ва ҷашну маросим ба қайд гирифта шуда, нисбат ба вайронкунандагони муқаррароти қонун чораҳои дахлдор андешида шудааст.

- Давоми се моҳи сипаришуда дар вилоят 1670 хатнасури хайриявӣ, 155 ҷуфт тӯйи домодию арӯсии хайриявии оилаҳои камбизоат гузаронида шудааст, ки нисбати ҳамин давраи соли гузашта 599 хатнасури хайриявӣ кам гардида, тӯйи домодию арӯсии хайриявии оилаҳои камбизоат 95 адад зиёд мебошад, - афзуд М. Шарифзода.