АҲЛИ ЭҶОДИ РӮЗНОМАИ "ХАТЛОН" БА ШОДБОШИ ҲАҚНАЗАР ҒОИБ РАФТАНД

Имрӯз, 7 январ, собиқ сармуҳаррири рӯзномаи “Хатлон”, Шоири халқии Тоҷикистон, барандаи Ҷоизаи давлатии Тоҷикистон ба номи Абуабдуллоҳ Рӯдакӣ устод Ҳақназар Ғоиб ба синни мубораки 80 расиданд.

Ҳақназар Ғоиб яке аз чеҳраҳои шинохта ва намоёни адабиёт ва рӯзноманигори варзидаи тоҷик буда, дар солҳои душвори 1990-1993 масъулияти сармуҳарририи рӯзномаи “Хатлон”-ро ба уҳда доштанд.

Асарҳои мондагору маҷмӯаҳои шеъриашон “Тӯшаи роҳ” (1972), “Рамзи ҳаёт” (1976), “Нигоҳи гарм” (1981), “Зинароҳ” (1983), “Атри гиёҳ” (1983), “Тоҷик Офтоб” (1985) “Чашми саҳар” (1989), “Дорожный провиант» (1989, Москва), “Эҳёнома” (1991), “Барги сабзи ишқ” (1995), “Дардномае ба миллат” (1996), “Сурӯши Хатлон” (1998), “Ашки Офтоб” (1999, 2005), “Таронаҳои маҳтобӣ” (2001), “Аз қафои шишаи борон” (2002), “Хаймаи нур”, “Зинда бо гудозишҳо” (2004), “Сарнавишт”, “Нафас то ба нафас овози вақт аст”, “Муқаддаснома” (2005), “Қиссаи аспи хатлӣ” (2006), “Навҳаи Фирдавсӣ бар марги Рустам” (2007), “Дар бистари нарми гул” (2009), “Муждаҳои ориёӣ” (2013” ва ғайраҳо ҳаводорони бешумор доранд.

Аҳли эҷоди рӯзнома бахшида ба 80-солагии собиқ сармуҳаррири рӯзномаи “Хатлон” устод Ҳақназар Ғоиб саҳифаи махсусеро бо фарогирии матлабҳои ҷолибу хонданӣ ба нашр расонид, ки он “БА ГИРОМИДОШТИ ШОИРИ МАҲБУБ ҲАҚНАЗАР ҒОИБ” ном дорад.