Озмуни ««Тоҷикон» – оинаи таърихи миллат» оғоз меёбад

Даври якуми озмуни ҷумҳуриявии ««Тоҷикон» – оинаи таърихи миллат» моҳи феврали соли ҷорӣ дар муассисаҳои таълимӣ ва ташкилоту муассисаҳои мақомоти худидоракунии шаҳрак ва деҳот баргузор мешавад.

Озмуни мазкур ба ифтихори 115-солагии академик Бобоҷон Ғафуров таҳти сарпарастии Президенти Ҷумҳурии Тоҷикистон дар чор давр, аз моҳи феврал то моҳи декабри соли 2023, гузаронида мешавад.

Барои ғолибони даври вилоятии Озмуни ҷумҳуриявии ««Тоҷикон» – оинаи таърихи миллат» аз ҷониби Раиси вилояти Хатлон Қурбон Ҳакимзода 237 ҳазор сомонӣ ҷудо гардидааст. Даври вилоятии озмуни мазкур нимаи дуюми моҳи сентябри соли 2023 дар шаҳрҳои Бохтар ва Кӯлоб баргузор мешавад. Дар даври вилоятии озмун ба ғолибони ҷойи якум 15 ҳазор сомонӣ, ҷойи дуюм 10 ҳазор сомонӣ ва ҷойи сеюм 5 ҳазор сомонӣ, инчунин барои омӯзгороне, ки шогирдонашон дар озмун ҷойҳои якум, дуюм ва сеюмро соҳиб мегарданд, мутаносибан 5000, 3000 ва 2000 сомонӣ укофотпулӣ дода мешавад.

Дар озмун тамоми қишрҳои ҷомеа дар чаҳор категория: хонандагони муассисаҳои таҳсилоти миёнаи умумӣ ва ибтидоии касбӣ; донишҷӯёни муассисаҳои таҳсилоти миёна ва олии касбӣ (бакалавр, магистр); омӯзгорони ҳамаи зинаҳои таҳсилот, ходи мони илмию адабии муассисаҳои илмиву эҷодӣ, фарҳангу санъат, аспирантон, унвонҷӯён, номзадони илм ва докторантҳои муассисаҳои таҳсилоти олии касбӣ ва муассисаҳои илмӣ (ба истиснои омӯзгорони фанни таърихи ҳамаи зинаҳои таҳсилот, докторони илм (анъанавӣ); калонсолон ва намояндагони касбу кори гуногун – иштирок карда метавонанд.

Ғолибони даври чорум (ҷойҳои 1, 2, 3) ва барандаи Шоҳҷоиза баъди хатми муассисаи таҳсилоти миёнаи умумӣ, ибтидоӣ, миёна ва олии касбӣ ба ихтисоси интихобкардаи худ бе озмун ва ба тариқи ройгон ба муассисаҳои таҳсилоти ибтидоӣ, миёна ва олии касбӣ ва касбии баъд аз муассисаи олии таълимии кишвар қабул карда мешаванд.

http://khatlon-ruznoma.tj/