Варзишгарони муваффақи соли 2022

Соли 2022 барои варзишгарони вилояти Хатлон соли бобарор ва хотирмон буд. Дар ин сол як қатор варзишгарон дар мусобиқаҳои сатҳи байналмилалӣ баромад намуда, аксарият бо дастовардҳои назаррас ба Ватан баргаштанд.

***
Нуралӣ Эмомалӣ, ғолиби Чемпионати ҷаҳон оид ба гӯштии ҷудо

Нуралӣ Эмомалӣ, зодаи ноҳияи Хуросон ва дастпарвари Клуби варзишии “Парвиз Собиров”-и шаҳри Душанбе мебошад. Ӯ соли 2022 дар шаҳри Гуанкили Эквадор дар мусобиқаи варзишӣ аз рӯйи гӯштии ҷудо ширкат варзида, рақибони худро шикаст дод ва соҳиби унвони Қаҳрамони ҷаҳон гардид.


***

Суннатулло Наврӯзов, ғолиби Чемпионати байналмилалӣ аз рӯйи намуди варзиши омехта 

Суннатулло Наврӯзов дастпарвари муассисаи давлатии “Мактаби маҳорати олии варзишӣ”-и вилояти Хатлон буда, соли 2022 дар Чемпионати ҷаҳон, ки дар шаҳри Абу-Дабии Аморати Муттаҳидаи Араб бургузор шуд, аз рӯйи муҳорибаҳои омехта соҳиби ҷойи аввал гардид.

***

Лайло Ҳалимова, ҳамлагари дастаи бонувони “Хатлон”

Лайло Ҳалимова, ҳамлагари дастаи бонувони “Хатлон”, дар мавсими футболи соли 2022-юм 68 тӯбро ба дарвозаи рақибон ворид намудааст. Ҳатто Месси дар як мавсими футбол натавонистааст, ки ин миқдор гол занад.

***

Тоҳирҷон Тағойзода, нимҳимоягари дастаи «Хатлон»

Тоҳирҷон Тағойзода, нимҳимоягари тими футболи «Хатлон»-и шаҳри Бохтар соҳиби ҷоизаи «Беҳтарин нимҳимоягари Чемпионати Тоҷикистон-2022» шуд, ки ин барои мактаби варзишии вилояти Хатлон дастоварди намоён аст.


Ҷасури ҚИЁМИДДИН,
“Хатлон”