Дӯстӣ. Таваҷҷуҳ ба рушди соҳаи боғдорӣ

Бо назардошти талаботи рӯзафзуни бозори истеъмолии кишвар ва эҳтиёҷоти кишварҳои олам ба меваҷоти аз лиҳози экологӣ тозаву хушсифат солҳои охир хоҷагидорони ноҳияи Дӯстӣ ба рушди соҳаи боғу токпарварӣ таваҷҷуҳи зиёд зоҳир намуда истодаанд.

Бо гирифтани ҳосили фаровони ангур, саҳмдорони хоҷагии деҳқонии “Муҳаммад Осимӣ”-и Ҷамоати деҳоти “Деҳқонобод” ният доранд, ки ҳаҷми содироти онро ба 100 тонна расонанд. Айни замон дар хоҷагии мазкур басту банди ҳосили ангур бо маром идома дорад.

Хоҷагии деҳқонии “Муҳаммад Осимӣ”-и Ҷамоати деҳоти “Деҳқононбод” 12 гектар замини корам дорад, ки 9 гектари онро токзор ташкил медиҳад. Дар хоҷагии мазкур 4 навъи ангури хушсифат, аз қабили “Шоҳона”, “Президент”, “Чиллагии сиёҳ” ва “Ғалаба”, ки ба иқлими минтақа мутобиқ мебошанд, парвариш карда мешавад.

Ангурбоғи хоҷагии деҳқонии мазкур соли 2009 бунёд гардида, қисмате аз он чаҳор сол мешавад, ки ба ҳосил даромада, соле аз 2 гектари он то 50 тонна ҳосили ангури хушсифат ба даст меоранд. Ба гуфтаи боғпарварон имсол ангурбоғ нисбат ба солҳои пешин ҳосили фаровон дорад.

Ба гуфтаи хоҷагидорон тибқи пешбиниҳо дар соли равон онҳо аз масоҳати 5 гектар токзор беш аз 100 тонна ҳосил хоҳанд рӯёнид. Зикр гардид, ки ангурбоғ дар асоси барномаҳои давлатии рушди соҳаи боғу токпарварӣ бунëд гардида, саҳмдорон мақсад доранд ҳаҷми истеҳсоли ангур ва содироти онро ба хориҷи мамлакат афзоиш диҳанд.

Саҳмдорони хоҷагии деҳқонии “Муҳаммад Осимӣ” тӯли чанд соли охир аз майдонҳои зархези хоҷагӣ, ҳосили фаровону босифат ба даст оварда, аз ин ҳисоб сатҳи рӯзгорро беҳтар намуда, ҳамзамон базаи моддиву техникии хоҷагиро такмил дода истодаанд.

Мавриди зикр аст, ки ду сол қабл дар хоҷагии деҳққонии “Муҳаммад Осимӣ” бо тавсияи мутахассисони шаҳри Турсунзода ниҳолони ангур ворид гардида, дар майдони беш аз ду гектар шинонида шудаанд, ки имрӯзҳо ин қитъаи ангурбоғи хоҷагӣ нашъунамои хеле хуб дорад.

Худойдоди Раҷаб, рӯзноманигор