Ошкоршавии ду ҳолати дуздӣ

Бино бар иттилои дафтари матбуоти Вазорати корҳои дохилаи Тоҷикистон ду ҳолати дуздӣ ошкор шуда, гумонбарон дастгир шуданд.

Тавре манбаъ хабар додааст, ахиран ба ШВКД дар ноҳияи Кӯшониён аризаи зани 37-солаи сокини ҳамин ноҳия ворид гардид, ки тибқи он 3 декабри соли 2024 шахсони номаълум бо роҳи пинҳонӣ вориди манзили истиқоматиаш шуда, аз онҷо 31 ҳазор сомониро дуздида, аз ҷойи ҳодиса ғайб задаанд.

Дар натиҷа кормандони милитсия марди 40-солаи сокини шаҳри Ваҳдатро ҳамчун гумонбар дар содир намудани ҷинояти дуздӣ дастгир намудаанд.

Ҳамзамон манбаъ иттилоъ додааст, ки ба ШВКД дар ноҳияи Фархор ҳам аризаи марди 47-солаи сокини ноҳияи мазкур ворид гардидааст, ки шаби 26 ба 27 ноябри соли 2024, тахминан соати 01:00 шахсони номаълум бо роҳи пинҳонӣ вориди манзили истиқоматиаш шуда, аз он ҷо 54 ҳазор сомониро дуздида, аз ҷойи ҳодиса ғайб задаанд.

- Дар натиҷаи гузаронидани чорабиниҳои оперативӣ-ҷустуҷӯӣ аз ҷониби кормандони милитсия марди 27-солаи сокини ноҳияи Восеъро ҳамчун гумонбар дар содир намудани ҷинояти дуздӣ дастгир намудаанд, - таъкид дошт манбаъ.

Инчунин дафтари матбуоти вазорати умури дохила зикр намудааст, ки дар ҳоли ҳозир, аз рӯи ҳодисаҳо мазкур тафтишот идома дорад.