Нақши ҷавонон дар интихоботи вакилони халқ

Интихоботи вакилони халқ дар Тоҷикистон, ки 2 март баргузор мешавад, дар ҳаёти сиёсӣ ва иҷтимоии кишвари мо рӯйдоди муҳим  мебошад.  Ҳар  як  шаҳрванд,  аз  ҷумла  ҷавонон,  имкон  доранд, ки дар ояндаи Ватани худ саҳм гузоранд. Аммо саволе ба миён меояд: нақши ҷавонон дар ин раванд чӣ гуна бояд бошад?

Ҷавонон  неруи  пешбарандаи ҷомеаанд.  Онҳо  бо  дониш,  идеяҳои тоза ва неруи худ метавонанд ба рушди устувори кишвар мусоидат кунанд. Интихобот  имконияти  беназирест,  ки шаҳрвандони  аз  18-сола  боло  метавонанд  овози  худро  баён  кунанд  ва саҳмгузори ояндаи беҳтари ҷомеа бошанд.

Барои ҷавонон муҳим аст, ки пеш аз раъй додан номзадҳоро таҳлил кунанд, барномаҳои онҳоро омӯзанд ва бо  масъулият  ба  интихобот  раванд. 

Ин  на  танҳо  ҳуқуқ,  балки  вазифаи шаҳрвандии  ҳар  як  ҷавон  аст.  Интихоботи  дуруст  метавонад  ба  ояндаи кишвар  таъсири  мусбат  расонад  ва ҷавонон бояд дар ин раванд намунаи ибрат бошанд.

Ҳамчунин,  ҷавонон  метавонанд фаъолона дар маъракаҳои иттилоотӣ, вохӯриҳо бо интихобкунандагон ва дигар  чорабиниҳои  интихоботӣ  ширкат варзанд.  Ин  на  танҳо  таҷриба  ва  дониш медиҳад, балки ба боло бурдани сатҳи огоҳии ҷомеа мусоидат мекунад.

Дар  шароити  имрӯза,  ки  технология  ва  шабакаҳои  иҷтимоӣ  ҷузъи ҷудонашавандаи  ҳаёти  ҷавонон  гардидаанд,  онҳо  метавонанд  аз  ин воситаҳо  барои  паҳн  кардани  маълумоти  дуруст  ва  тарғиби  иштироки фаъоли интихобкунандагон истифода баранд.

Ниҳоят,  ҷавонон  бояд  донанд, ки  онҳо  на  танҳо  ояндасоз,  балки имрӯзсоз  низ  ҳастанд.  Интихоби  дурусту огоҳона метавонад ояндаи кишварро  рӯшантар  созад.  Пас,  биёед масъулиятшинос  бошем  ва  дар  ин маъракаи  муҳим  саҳми  арзандаи  худро гузорем.

Ҷавон  будан  маънои  фаъол  ва масъулиятшинос  буданро  дорад. Интихобот  имкониятест,  ки  мо  бо ҳамдигар  як  ояндаи  беҳтарро  бунёд кунем.

Фарида Баротова,
директори китобхонаи
бачагонаи шаҳри Левакант