НОМАИ ТАҚДИРИ МИЛЛАТ

Дар  Иҷлосияи  таърихии 16-уми  Шурои  Олии  Ҷумҳурии Тоҷикистон,  ки  моҳи  ноябри  соли 1992 дар шаҳри Хуҷанд баргузор шуд, зарурати қабули Конститутсияи Ҷумҳурии Тоҷикистон масъалагузорӣ гардид ва дар муддати кӯтоҳтарин бо ташаббуси Сарвари хирадманд ва оқили мо муҳтарам Эмомалӣ Раҳмон аз ҷумлаи олимон ва ҳуқуқшиносон гурӯҳи корӣ таъсис дода шуд. Вазифаи гурӯҳ таҳияи лоиҳаи Конститутсияи Ҷумҳурии Тоҷикистон буд.

13-уми  апрели  соли  1993  лоиҳаи  пурраи  Конститутсияи  Ҷумҳурии  Тоҷикистон  омода  гардид,  бо қарори  Раёсати  Шурои  Олии  Ҷумҳурии  Тоҷикистон он ба муҳокимаи умумихалқӣ пешниҳод карда шуд ва аз ҷониби шаҳрвандон санаи 6-уми ноябри соли 1994 тариқи  раъйпурсии  умумихалқӣ  қабул  гардид.  Дар он мардуми сарбаланди тоҷик бо мақсади муқаррар қардани  ҳолати  ҳуқуқии  шахс  дар  дохил  ва  хориҷи кишвар, яъне ояндаи давлату миллати худ фаъолона иштирок карда, раъйи худро доданд.

Воқеан, КонститутсияиҶумҳурии Тоҷикистон ояндаи давлату миллати моро муқаррар мекунад. Тибқи моддаи 6-уми он “Дар Ҷумҳурии Тоҷикистон халқ баёнгари соҳибихтиёрӣ ва сарчашмаи ягонаи ҳокимияти давлатӣ буда, онро бевосита ва ё ба воситаи вакилони худ амалӣ мегардонад”. Ин гуфтаҳо шаҳодати он аст, ки имрӯз халқ бевосита Сарвари давлатро интихоб менамояд ва 
дар мақомоти олии қонунгузор ва намояндагӣ вакилони худро интихоб намуда, дар идораку-нии давлат бевосита ё бавоситаиштирок менамояд.

Конститутсияи Ҷумҳурии Тоҷикистон инъикосгари ормони халқи тоҷик буда, барои пойдории ҳокимияти конститутсионӣ,  тақвияти  рукнҳои  давлатдории миллӣ, мушарраф гардидан ба дастовардҳои сиёсиву иқтисодӣ ва иҷтимоиву фарҳангӣ, ташаккули ҷомеаи шаҳрвандӣ, гуногунандешӣ, заминаи мусоид ва боэътимоди ҳуқуқиро фароҳам овард. Яке аз зарфиятҳои Конститутсияи  Ҷумҳурии  Тоҷикистон  принсипи башардӯстӣ  буда,  арзиши  олӣ  эътироф  гардидани ҳуқуқу озодиҳои инсон шаҳодати ин гуфтаҳост.

Конститутсия  танзимгари  муносибатҳои  сиёсӣ, иқтисодӣ, иҷтимоӣ ва фарҳангии ҷомеа мебошад. Бо шарофати Конститутсия шаҳрвандон тавонистанд якчанд маротиба дар интихоботи Президенти Ҷумҳурии Тоҷикистон  ва  вакилони  Маҷлиси  намояндагони Маҷлиси  Олии  кишвар  иштирок  ва  онҳоро  интихоб намоянд.  Маҳз  дар  Конститутсия  унсурҳои  асосии давлатдории  муосири  Тоҷикистон,  махсусан  демократия,  соҳибихтиёрӣ,  ҳуқуқбунёду  дунявӣ,  ягонагӣ ва  иҷтимоӣ  муайян  гардида,  он  ба  рамзи  ягонагии миллати  тоҷик,  баҳамоии  қишрҳои  гуногуни  ҷомеа, марҳилаи  нави  бунёди  давлати  миллии  тоҷикон  бо номи  Ҷумҳурии  Тоҷикистон,  сулҳу  субот,  оромию осудагӣ ва саҳифаи нави таърих табдил ёфтааст. 

Дар  ҳақиқат,  Конститутсия  дар  рушди  давлатдории миллии тоҷикон нақши муассир дорад, бинобар ин,  эҳтироми  Конститутсия  ва  арҷ  гузоштан  ба  он бояд  ба  одати  ҳар  як  шаҳрванд  табдил  ёбад.  Зеро Конститутсия таҷассумгари моҳияти сиёсӣ, ҳуқуқӣ ва маънавии давлат аст. Ҳар фарди кишвар имрӯз вазифадор  аст,  ки  ҳар  банди  онро  риоя  кунад,  ҳуқуқу озодӣ,  шарафу  номуси  дигаронро  эҳтиром  намояд. 

Танҳо бо ҳамин роҳ мо метавонем ба ҳадафи ниҳоии худ, яъне бунёди давлати аз ҳар ҷиҳат пешрафта ва зиндагии шоиста бирасем.

Рамазони МАҲИМБЕК,
мудири парки технологии 
Коллеҷи махсусгардонидашудаи 
шаҳри Бохтар