НАМОИШНОМАИ “МЕТРАНПАЖ” БАҲРИ ҲАВОДОРОНИ САНЪАТ ПЕШКАШ ГАРДИД

Дар Театри вилоятии мусиқӣ-мазҳакавии ба номи Ато Муҳаммадҷонови шаҳри Бохтар намоишномаи “Метранпаж” аз рӯи асари драматурги маъруф Александр Вампилов манзури тамошобинон гардид.

Намоишнома дар таҳияи коргардон Кароматулло Сафаров рӯи саҳна омада, бо иштироки ҳунармандони театр фазои гарму ҷолиби фарҳангиро ба вуҷуд овард. Ҳунармандон бо маҳорати баланди саҳнавӣ ва бозии таъсирбахш муҳтавои асарро ба тамошобинон расонида, масъалаҳои ахлоқӣ, муносибатҳои инсонӣ ва воқеиятҳои зиндагиро инъикос намуданд.

Дар ҷараёни намоиш ҳаводорони санъати театрӣ ва намояндагони ташкилоту муассисаҳои гуногун иштирок намуда, ба ҳунару истеъдоди аҳли театр баҳои баланд доданд.

Бояд гуфт, ки пешниҳоди чунин намоишномаҳо дар баланд гардидани завқи фарҳангии ҷомеа ва рушди санъати театрӣ нақши муассир мегузорад.

Н. САМАДЗОДА, "ХАТЛОН"