ДАР ЯК САТР
Рӯзномаи Хатлон » Ҳокимияти давлати » ИШТИРОКИ ЗИЁДА АЗ 30 ҲАЗОР НАФАР ДАР ДАВИ МИЛЛӢ ВА МАРАФОНИ ВЕЛОСИПЕДРОНӢ ДАР БОХТАР


ИШТИРОКИ ЗИЁДА АЗ 30 ҲАЗОР НАФАР ДАР ДАВИ МИЛЛӢ ВА МАРАФОНИ ВЕЛОСИПЕДРОНӢ ДАР БОХТАР

Муҳаррир: Суҳроби Рустам аз 17 май, Бахш: Ҳокимияти давлати / Слайдер / Матлабҳои охирин / Хабари рӯз / Хабарҳо, Боздид 2


Имрӯз, 17 май, дар маркази маъмурии вилояти Хатлон шаҳри Бохтар Дави миллӣ ва марафони велосипедронӣ бо иштироки беш аз 30 ҳазор нафар баргузор гардид. Чорабинии оммавии варзишӣ ба ифтихори Рӯзи ҷавонони Тоҷикистон доир шуда, ҳадафи он тарғиби тарзи ҳаёти солим, рушди фарҳанги ҷисмонӣ ва ҷалби сокинон, бахусус ҷавонон, ба варзиш арзёбӣ гардид.

Дар ҳамоиши бошукӯҳи варзишӣ раиси вилояти Хатлон Давлаталӣ Саид, роҳбарону намояндагони мақомоти ҳифзи ҳуқуқ, кормандони ташкилоту муассисаҳо, варзишгарон, ҷавонон ва ҳазорон нафар сокинони шаҳру ноҳияҳои вилоят иштирок намуданд.

Чорабинӣ дар фазои тантанавӣ оғоз гардида, иштирокчиён бо рӯҳияи баланд ва эҳсоси ватандӯстӣ масири муайяншударо тай карданд. Марафони велосипедронӣ низ бо иштироки фаъоли дӯстдорони варзиш баргузор шуда, ба фазои идонаи шаҳр шукӯҳи бештар бахшид.

Раиси вилояти Хатлон зимни суханронӣ таъкид намуд, ки баргузории чунин чорабиниҳои оммавии варзишӣ барои таҳкими саломатии ҷомеа, тарбияи насли солиму фаъол ва рушди соҳаи варзиш аҳамияти махсус дорад. Зикр гардид, ки маҳз тавассути рушди варзиш ва ҷалби ҷавонон ба тарзи ҳаёти солим метавон ҷомеаи неруманду созанда бунёд кард.

Таъкид шуд, ки дар солҳои соҳибистиқлолӣ таҳти сиёсати варзишпарваронаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба рушди инфрасохтори варзишӣ, оммавигардонии варзиш ва фароҳамсозии шароити мусоид барои ҷавонон таваҷҷуҳи хосса зоҳир мегардад.

Тибқи маълумоти пешниҳодшуда, дар Дави миллӣ зиёда аз 30 ҳазор нафар ва дар марафони велосипедронӣ беш аз 1200 нафар иштирок намуданд. Иштирокчиён бо руҳияи болида ва ҳисси ифтихори миллӣ дар чорабинӣ ширкат варзида, саҳнаи зебои ҳамбастагӣ ва солимгардонии ҷомеаро ба намоиш гузоштанд.

Дар фарҷоми чорабинӣ ба ғолибон ва фаъолони мусобиқа диплом, сипоснома ва туҳфаҳои хотиравӣ тақдим карда шуд.

Ёдовар мешавем, ки Дави миллӣ дар Ҷумҳурии Тоҷикистон ҳамасола дар асоси Фармони Президенти Ҷумҳурии Тоҷикистон аз 28 марти соли 2007, ҳар якшанбеи сеюми моҳи май, дар арафаи таҷлили Рӯзи ҷавонони Тоҷикистон баргузор мегардад. Имсол бошад маротибаи 19-ум ин мусобиқа дар саротосари кишвар бо тантана таҷлил гардид.

Н. Смадзода, "Хатлон"

Дигар хабарҳо

ПРЕЗИДЕНТ

Нашрияи мо (PDF)

Бойгонӣ

Май 2026 (63)
Апрел 2026 (86)
Март 2026 (82)
Феврал 2026 (80)
Январ 2026 (70)
Декабр 2025 (68)

Рӯзнома дар Вазорати фарҳанги Ҷумҳурии Тоҷикистон таҳти рақами 117/рз-97 аз 07 январи соли 2019 аз нав ба ҳисоб гирифта шудааст.

категорияҳо

хабарҳои охир

Яндекс.Метрика

Сомонаҳои расмӣ

Муассис:

МАҚОМОТИ ИҶРОИЯИ ҲОКИМИЯТИ ДАВЛАТИИ ВИЛОЯТИ ХАТЛОН

САРМУҲАРРИР

Носирҷон Маъмурзода