Рушди иқтисоди рақамӣ ба пешрафти иқтисодиёт мусоидат мекунад

Эълон  гардидани  солҳои  2025-2030  ҳамчун  «Солҳои  рушди  иқтисоди  рақамӣ  ва  инноватсия»  аз  ҷониби  Асосгузори сулҳу  ваҳдати  миллӣ  –  Пешвои  миллат,  Президенти  Ҷумҳурии Тоҷикистон муҳтарам Эмомалӣ Раҳмон як иқдоми бениҳоят муҳим ва саривақтӣ барои рушди устувори кишвари мост. Ин ташаббус дар шароите, ки иқтисодиёти ҷаҳонӣ ба самти рақамикунонӣ ва истифодаи технологияҳои инноватсионӣ ҳаракат мекунад, дорои аҳамияти стратегӣ мебошад.

Рушди  иқтисоди  рақамӣ  на  танҳо  ба  пешрафти  иқтисодиёт, балки  ба  беҳбуди  зиндагии  ҳар  як  сокини  кишвар  мусоидат хоҳад  кард.  Иқтисоди  рақамӣ  имконият  медиҳад,  ки  равандҳои истеҳсолӣ, хизматрасонӣ ва идоракунӣ бо самаранокии бештар ба роҳ монда шаванд. Инноватсия бошад, насли ҷавонро барои ихтироъкорӣ ва рушди зеҳнӣ ҳавасманд менамояд.

Татбиқи ин ташаббус метавонад ба як қатор самтҳои муҳим таъсири мусбат расонад:

1.  Таъмини  ҷойҳои  нави  корӣ:  Бо  рушди  соҳаҳои  рақамӣ  ва технологӣ, имкониятҳои нави шуғл барои ҷавонон фароҳам хоҳад омад.

2.  Беҳбуди  маориф  ва  илм:  Иқтисоди  рақамӣ  ташаккули барномаҳои  таълимии  замонавӣ  ва  рушди  фанновариҳои  таълимиро талаб менамояд, ки дар натиҷа сифати таҳсилот баланд мегардад.

3.  Содагардонии  хизматрасониҳо:  Бо  рақамикунонии  бахши давлатӣ, шаҳрвандон метавонанд бо осонӣ ба хизматрасониҳои давлатӣ ва дигар бахшҳо дастрасӣ пайдо кунанд.

4. Ҷалби сармоягузорӣ: Рушди инноватсия ва рақамикунонӣ Тоҷикистонро  барои  сармоягузорони  хориҷӣ  ҷолибтар  мегардонад.

Барои татбиқи самараноки ин ҳадафҳо, мо, фаъолонаи ҷомеа, бояд дар ҳамкорӣ бо давлат ва бахши хусусӣ саҳмгузор бошем. Омӯзиш ва истифодаи технологияҳои муосир бояд ба як қисми фарҳанги рӯзмарраи ҳар фарди кишвар табдил ёбад. Ҳамзамон, лозим аст, ки таваҷҷуҳи махсус ба рушди инфрасохтори рақамӣ ва омодасозии мутахассисони баландихтисос зоҳир гардад.

Эълони ин солҳо ҳамчун давраи рушди иқтисоди рақамӣ ва инноватсия марҳалаи нави пешрафтро барои Тоҷикистон оғоз мекунад. Бовар дорам, ки бо дастгирии Ҳукумати кишвар ва саъю талоши  ҳар  як  шаҳрванди  боғайрат,  мо  метавонем  ҳадафҳои гузошташударо амалӣ намоем ва Тоҷикистонро ба як кишвари рақобатпазир дар арсаи ҷаҳонӣ табдил диҳем.

Юсуф АМИРХОН,
мудири шуъбаи рушди иҷтимоӣ ва робита бо ҷомеаи дастгоҳи раиси вилоят