ТАҚВИЯТИ ҲАМКОРИҲО БО ДОИРАҲОИ САРМОЯГУЗОРИИ ЧИН

Муҳаррир: Суҳроби Рустам аз 21 ноябр, Бахш: Ҳокимияти давлати / Слайдер / Матлабҳои охирин / Хабари рӯз / Хабарҳо, Боздид 135

Раиси вилояти Хатлон Давлаталӣ Саид бо ҳайати намояндагони ширкати “Shanghai SUS Environment”-и Ҷумҳурии Мардумии Чин мулоқот анҷом дод.

Дар мулоқот Дэвид Чжоу, намояндаи аввали ширкат дар Осиёи Марказӣ, Чентсяо Чжоу, менеҷер, сармоягузор ва ҳайати ҳамроҳонашон иштирок намуданд.

Зимни суҳбат ҷонибҳо доир ба густариши робитаҳои ду давлати дӯст мубодилаи афкор намуда, қаноатмандии худро ҷиҳати татбиқи лоиҳаҳо дар самтҳои мухталифи хоҷагии халқ дар вилояти Хатлон баён доштанд.

Раиси вилоят Давлаталӣ Саид бо ёдоварӣ аз ҳадафҳои созандаи Ҳукумати Ҷумҳурии Тоҷикистон, ки дар ҳамкорӣ бо шарикони рушд амалӣ мегардад, барои тақвияти ҳамкориҳо омодагии вилоятро изҳор дошт.

Дар мулоқот мавзуи сармоягузорӣ ва таҳияи лоиҳаҳои сӯзонидани партовҳои сахти коммуналӣ барои истеҳсолоти барқ мавриди баррасӣ қарор дода шуд.

Гуфта шуд, ки ширкати “Shanghai SUS Environment” соли 2008 таъсис ёфта, ба як таъминкунандаи пешбари глобалии ҳалли экологӣ, бахусус дар соҳаи партов ба энергия (WtE) табдил ёфтааст. Он хидматҳоро барои сармоягузорӣ, сохтмон ва истифодаи неругоҳҳои WtE пешниҳод мекунад. Он бузургтарин истеҳсолкунандаи оташдон дар ҷаҳон ва дувумин сармоягузор дар лоиҳаҳои WtE дар ҷаҳон аст. Неругоҳҳои WtE партовҳои сахти коммуналиро (MSW) ба неруи барқ ҳамчун манбаи устувори энергияи сабз табдил медиҳанд.

Намояндагони ширкати мазкур омодагии худро барои амалисозии лоиҳаи сармоягузорӣ оид ба сӯзонидани партовҳо барои истеҳсоли неруи барқ баён доштанд.

Амалишавии лоиҳаи мазкур натанҳо таъмини устувор ва тозаи неруи барқ мебошад, балки ба таъсиси ҷойҳои корӣ, омӯзиш ва рушди иҷтимоӣ дар минтақа низ мусоидат хоҳад кард.

Раиси вилояти Хатлон Давлаталӣ Саид оид ба ҳамкориҳои Ҷумҳурии Тоҷикистон бо Ҷумҳурии Мардумии Чин таъкид намуд: "Мо барои рушду пешрафти ҳарду кишвар, густариши муносибатҳои давлатӣ ва баланд бардоштани зиндагии мардум тамоми чораҳоро меандешем".

Ҷонибҳо ҳамчунин доир ба дигар масъалаҳои мубрами ҳамкориҳои тиҷоратию иқтисодӣ табодули назар карданд.