Содироти беш аз 40 намуди маҳсулоти кишоварзӣ

Хоҷагидорони  вилояти  Хатлон  бо  фаровон омадани ҳосили маҳсулоти кишоварзӣ, аз ҷумла зардолу, олу, шафтолу, лимӯ, ангур, карам, лаблабу ва полезиҳо барои сари вақт ва беталаф ҷамъ овардани ҳосил ва содироти он бо  мусоидати  Мақомоти  иҷроияи  ҳокимияти давлатии  вилояти  Хатлон  дар  ҳамаи  шаҳру ноҳияҳо равзанаи ягонаи амалиёти содиротӣ, назорат  ва  барасмиятдарории  маҳсулоти  содиршаванда ташкил карда шудааст, ки ин имкон  медиҳад  содироти  бемайлони  маҳсулот амалӣ гардад.

Аз ҷониби бахши намояндагии Агентии содироти назди Ҳукумати Ҷумҳурии Тоҷикистон дар вилояти Хатлон дар ин давра ба маблағи 154 миллион доллари ИМА молу маҳсулот содирот гардидааст, ки аз ин ҳисоб 4 фоиз онро содироти маҳсулоти кишоварзӣ ташкил менамояд. 

Дар  ин  давра  тибқи  маълумоти  Раёсати минтақавии гумрукӣ дар вилояти Хатлон танҳо ба воситаи гумруки вилояти Хатлон ба миқдори 16 ҳазору 96 тонна маҳсулоти кишоварзӣ содирот шудааст, аз он ҷумла 8 ҳазору 639 тонна пиёз, 258 тонна карам, 480 тонна лаблабу, 52 тонна кадуи сабз, 1 ҳазору 277 тонна писта, 40 тонна  чормағзи  заминӣ,  700  тонна  ангур,  8,6 тонна сирпиёз, 572 тонна зардолу, 402 тонна тарбуз,  6  тонна  харбуза,  52  тонна  себ,  95,7 тонна  шафтолу,  498  тонна  тухми  офтобпараст, 2281 тонна олу, 4 тонна лимӯ, 17,5 тонна қаламфур,  24  тонна  нок  ва  685  тонна  меваи хушк  (чормағз)  ва   16  тоннаро   мағзи   писта ташкил  медиҳад.  Қисми  зиёди  маҳсулоти кишоварзӣ  асосан  ба  давлатҳои  Покистон  6  ҳазору  288  тонна,   Афғонистон  2 ҳазору 332 тонна, Қазоқистон 3 ҳазору 100 тонна, Россия 3 ҳазору 509 тонна, Ӯзбекистон 773 тонна ва Беларусия 76 тонна содирот карда шудааст. 

Содироти маҳсулоти кишоварзӣ тавассути роҳи оҳани Хатлон 22 қатора, бо  вазни  умумии  1  ҳазору  329  тонна пиёзи  барвақтӣ  аз  шаҳру  ноҳияҳои Ҷайҳун,  Ҷ.  Балхӣ,  Левакант  коркард гардида,  ба  Ҷумҳурии  Қазоқистон  ва Россия содирот карда шудааст.

Ҳамзамон, аз  вилоят  ба хориҷи  кишвар  296  ҳазору  389  тонна семент, 42 ҳазору 596 тона нахи пахта, 2 ҳазору 604 тонна нуриҳои минералӣ, 7 ҳазору 46 тонна калобаи ресандагӣ, 788  тонна  гачкартон  содирот  гардид.  Фарогирии  содироти  маҳсулот аз  вилояти  Хатлон  мунтазам  афзуда, ҳамасола зиёда аз 40 намуд маҳсулот, ба  беш  аз  10  давлати  хориҷи  кишвар содирот шудааст.

Умед ЗОҲИРЗОДА, 
мудири бахши намояндагии Агентии содироти назди
Ҳукумати Ҷумҳурии Тоҷикистон дар вилояти Хатлон