Омодагӣ ба Форуми «Хатлон Инвест-2024»

17-18 октябр дар доираи баргузории Форуми байналмилалии «Хатлон Инвест-2024» ва намоишгоҳи «Бохтар Фуд» байни намояндагони доираҳои тиҷоратӣ ва соҳибкорону сармоягузорон Ёддошти тафоҳум ба имзо мерасад. Дар ин хусус зимни ҷаласаи ситоди корӣ оид ба ин форум, ки таҳти раёсати раиси вилоят Давлаталӣ Саид баргузор гашт, иттилоъ дода шуд.

Дар ҷараёни форум намоиши маҳсулоти кишоварзӣ ва саноатӣ ташкил шуда, ҳунарҳои мардумӣ ва сайёҳии вилоят низ муаррифӣ мегардад.

Раиси вилояти Хатлон Давлаталӣ Саид дар ҷаласаи ситод иброз дошт, ки Форуми байналмилалии «Хатлон Инвест-2024» ва намоишгоҳи «Бохтар Фуд» бо супориши Президенти Ҷумҳурии Тоҷикистон муҳтарам Эмомалӣ Раҳмон доир мегардад.

Ҳадафи форум баланд бардоштани рақобатпазирии маҳсулоти ватанӣ дар бозорҳои дохилӣ ва хориҷӣ, тақвияти истеҳсолоти ба содирот нигаронида, густариши муносибатҳои тиҷоратии харидорону содироткунандагон тавассути муаррифии имконият ва маҳсулоти содиротии ҷумҳурӣ мебошад.