Фестивали «Оши палов» кай мешавад?

Рӯзи 20 октябр дар Боғи фарҳангию фароғатии ба номи Абулқосим Фирдавсии пойтахт Иди Меҳргон дар якҷоягӣ бо Фестивали занбӯрпарварон, намоиш-фурӯши асал, Иди себу ангур ва Фестивали «Оши палов», намоиш-фурӯши шолӣ ва биринҷ баргузор мегардад.

Ба рӯзномаи «Хатлон» дар Сарраёсати кишоварзии вилоят хабар доданд, дар саҳни ҷашнгоҳ деҳқонон аз тамоми гӯшаву канори ҷумҳурӣ, аз он ҷумла аз вилояти Хатлон, дастранҷи худ – маҳсулоти кишоварзӣ, аз қабили навъҳои гуногуни биринҷу шолӣ, себу ангур, сабзавот ва меваҷотро, ки хоси ҷашни Меҳргон аст, ба намоиш мегузоранд.

Ҳамчунин аз ҷониби беҳтарин кадбонуҳои Хатлон хӯрокҳои миллӣ омода гардида, ҳунармандони мардумӣ маҳсули дасти хешро манзури сокинон ва меҳмонони пойтахт мегардонанд. Инчунин дар ин идгоҳ маҳсулоти кишоварзӣ бо нархи дастрас пешниҳоди сокинон гардонида мешавад.