МАРОСИМИ ГУСЕЛИ НАВАСКАРОН БА САФИ ҚУВВАҲОИ МУСАЛЛАҲИ ҶТ

Имрӯз, 3-уми октябр, дар маркази маъмурии вилояти Хатлон – шаҳри Бохтар рӯзи даъватшавандагон ба сафи Қувваҳои мусаллаҳаи Ҷумҳурии Тоҷикистон сурат гирифт. Наваскарон аз назди бинои комиссариати ҳарбии вилояти Хатлон бо шиору овезаҳои ватандӯстона то майдони варзишии Донишгоҳи давлатии Бохтар ба номи Носир Хусрав роҳпаймоӣ намуданд.

Бояд изҳор дошт, ки дар майдони варзишии ДДБ ба номи Носири Хусрав даъватшавандагонро Раиси вилоят муҳтарам Қурбон Ҳакимзода, муовинони раиси вилоят, раиси шаҳри Бохтар, комиссари ҳарбии вилоят, сардори Раёсати Кумитаи давлатии амнияти миллӣ дар вилоят ва дигар роҳбарони ташкилоту идораҳои давлатӣ, омӯзгорону донишҷӯён ва волидони даъватшудагон гарму самимӣ истиқобол гирифтанд.

Дар маросими гусели наваскарон ба сафи Қувваҳои мусаллаҳи Ҷумҳурии Тоҷикистон, муҳтарам Қурбон Ҳакимзода, раиси вилояти Хатлон суханронӣ намуда, барои шуҷоату мардонагӣ ва далериву ҷасуришаон аҳсану офарин хонд. Мавсуф қайд дошт, ки хизмат дар сафи қувваҳои мусаллаҳ барои ҳар як ҷавонмард мактаби мардонагӣ буда, барои зиндагии оянда ҳамчун заминаи нек поягузор мешавад. Раиси вилоят наваскаронро ба муносибати оғози мавсими нави даъват ба сафи Қувваҳои мусаллаҳи Ҷумҳурии Тоҷикистон муборакбод гуфт.

Ҳамин тариқ, Абдусаттор Шоҳиён муовини Вазири мудофиаи Ҷумҳурии Тоҷикистон ба минбар баромада, оид ба корҳои сиёсӣ – тарбиявӣ доир ба шароити хизмати ҳарбӣ дар сафи Қувваҳои мусаллаҳи Ҷумҳурии Тоҷикистон баромад намуд. Ҳамзамон, изҳор дошт, ки имрӯзҳо дар сафи Қувваҳои мусаллаҳи Ҷумҳурии Тоҷикстон асакарони шуҷои вилояти Хатлон ва дигар шаҳру навоҳии ҷумҳурӣ сарбаландона адои хизмат намуда истодаанд.

Сипас, чанде аз ҳозирин суханронӣ намуда, вобаста ба самтҳои мухталиф маъруза карданд. Дар ин баробар, модари сарбози шаҳидшуда – Муҳаммадҷон Пиров дар назди ҳозирин баромада намуда, ҷавонони шуҷои ватанро барои ҳимояи марзу буми кишвар даъват намуд. Ӯ изҳор дошт, ки аз қаҳрамонии писараш ифтихор мекунад.

Баъдан, ба ҳамаи наваскарон аз ҷониби Қурбон Ҳакимзода туҳфаи хотиравӣ супорида шуд. Дар охири ҳамоиш ҳунармандони бахши фарҳанг баҳри болида гардонидани хотири наваскарон ва ҳозирин, барномаи консертӣ бо даргири суруду таронаҳои тараннумгари ватанро пешкаш намуданд.