Ба сарҳадбонон 250 китоби бадеӣ, илмӣ ва публитсистӣ тақдим шуд

Дирӯз раиси вилояти Хатлон Қурбон Ҳакимзода дар арафаи Соли нави мелодӣ ба табрики афсарону сарбозони қисми низомии қӯшунҳои сарҳадии КДАМ дар ноҳияи Панҷ рафта буданд.

Зимни боздид ба раиси вилоят Қурбон Ҳакимзода иттилоъ доданд, ки баҳри бозомӯзии афсарони қӯшунҳои мазкур толори дорои китобҳои соҳавию адабӣ ҷудо шудааст. Раиси вилоят дастур доданд, ки китобхонаи сарҳадбонон бо асарҳои тозанашр таъмин карда шавад.

Тибқи ин дастур, аллакай имрӯз бастаи якуми китобҳо иборат аз 250 нусха китобҳои арзишманд, амсоли "Чеҳраҳои мондагор", "Уфуқҳои истиқлол", "Забони миллат - ҳастии миллат"-и Пешвои миллат муҳтарам Эмомалӣ Раҳмон, "Тоҷикон"-и академик Бобоҷон Ғафуров, "Эмомалӣ Раҳмон ва эҳёи давлатдории миллӣ", инчунин осори насрию назмии адибони классику муосири тоҷик ба қисми ҳарбии мазкур дастрас ва аз номи раиси вилоят тақдим карда шуд.