Фарзанди Ватан - Гулафзо

Китоби “Фарзанди Ватан”-и Субҳон Ёдгорӣ, романи таърихӣ-тарбиявӣ мебошад. Асари мазкур дар бораи яке аз ходимони ҷамъиятиву сиёсӣ Гулафзо Савриддинова нақл мекунад. “Фарзанди Ватан» яке аз асарҳои арзишмандест, ки бо забони равону фасеҳ навишта шуда, ба хонанда таассуроти амиқ мегузорад. Мазмун ва муҳтавои китоб хонандаро водор месозад, ки дар бораи рисолати худ ҳамчун фарзанди Ватан андеша кунад ва барои ободии ҷомеа саҳм гузорад.

Асар ҷанбаҳои тарбиявӣ ва маърифатӣ дорад ва хонандаро ба эҳтироми Ватан, маърифат ва саъю кӯшиш барои ободии он даъват мекунад. Ҳамчунин, он мушкилоти иҷтимоии замони муайянро ба риштаи тасвир кашида, паёмҳои муҳимми ахлоқӣ медиҳад. Субҳон Ёдгорӣ яке аз шахсиятҳои шинохта ва маъруфи фарҳангӣ ва адабии Тоҷикистон буд.

Ӯ ҳамчун нависанда, журналист ва адиб дар ташаккул ва рушди адабиёти муосири тоҷик саҳми назаррас гузоштааст. Ёдгорӣ бо асарҳои худ, ки аксаран ба мавзуъҳои ватандӯстӣ, худшиносӣ ва маърифати миллӣ бахшида шудаанд, дар миёни хонандагон маъруфият пайдо кардааст.

Ӯ на танҳо як нависандаи эҷодкор, балки инсони масъул ва дӯстдори Ватан буд. Дар осори ӯ ҳамеша ҳисси муҳаббат ба Ватан, таърихи миллат ва арзишҳои фарҳангӣ ба таври амиқ инъикос ёфтааст. Китобҳои Субҳон Ёдгорӣ, аз ҷумла “Фарзанди Ватан”, хонандаро ба фикрронӣ, худшиносӣ ва амалҳои нек ташвиқ мекунанд.

Озода Раҳматова, саромӯзгори кафедраи забон ва адабиёти тоҷики Коллеҷи омӯзгории шаҳри Бохтар, дар бораи китоби “Фарзанди Ватан”-и Субҳон Ёдгорӣ андешаҳои ҷолиб ва пурмуҳтаво баён кард. Ӯ қайд намуд, ки ин китоб ба масъалаҳои ватандӯстӣ, худшиносӣ ва масъулияти ҳар як фарди ҷомеа дар назди Ватан равшанӣ меандозад.

Ба гуфтаи ӯ, Субҳон Ёдгорӣ дар асараш масъалаҳои муҳими зиндагии рӯзмарраи инсон ва муносибати ӯро бо муҳити атроф баён мекунад. Мутолиаи он барои ҳар нафаре, ки ба ояндаи Ватан бетараф нест, хеле муфид аст. Озода Раҳматова ҳамзамон ба истеъдод ва маҳорати нависандагии Субҳон Ёдгорӣ баҳои баланд дода, китобро ба кулли дӯстдорони каломи бадеъ ва адабиёт тавсия дод ва таъкид намуд, ки мутолиаи чунин асарҳо дар ташаккули афкори ватандӯстонаи хонандагон нақши бузург мебозад.

Аҳадуллои Мирзоалӣ,
«Хатлон»