Дар як сатр
» » Шӯрои уламо: Ислом ба ҳеҷ гуна ҳизб ниёз надорад

Шӯрои уламо: Ислом ба ҳеҷ гуна ҳизб ниёз надорад

24-02-2015, 08:16

Шӯрои уламо: Ислом ба ҳеҷ гуна ҳизб ниёз надорад
Шӯрои уламои Маркази исломии Тоҷикистон сӯйистифода аз номи дини мубини исломро дар маъракаи пешазинтихоботии кишвар маҳкум кард. «Афроде, ки аз номи Ислом тафриқаандозӣ мекунанд, «мушрикону мунофиқон» мебошанд», - омадааст дар муроҷиатномаи Шӯрои уламо.

Дар баёния таъкид шудааст, ки «мо дар арафаи интихобот қарор дорем ва дар ин маъракаи сиёсӣ сӯиистифода аз номи ислом бо ҳар навъ назару ақидаҳои ботили авомфиребона аз рӯйи хираду тафаккури солим нест. Интихобот аз рӯйи фаҳму идроки ҳар як аъзои бошуури ҷомеа ва тибқи қонунҳо сурат мегирад. Зимнан, ин ҳуқуқи инсонию мусулмонии ҳар фарди ҷомеа мебошад, ки ба кадом ҳизбу барномаи он ва номзади алоҳидаи пешбаришуда раъй медиҳад. Ба ҳеҷ ваҷҳ ҳизбҳо ва номзадҳо аз боварии мардум ба дини мубини ислом набояд сӯйистифода кунанд. Чунин шеваи кору роҳнамоӣ на ба муқаррароти ислом, на ба ягон қонуни демократия, озодии баёну афкор ва изҳори иродаи сиёсӣ мувофиқат намекунад».

Раёсати Шӯрои уламо ҳамчунин таъкид мекунад, ки аҳзобу ашхосе, ки бидуни ягон ғараз, бидуни рӯйи саҳна кашидани ислому истифодаи он ҳамарӯза дар зикри Худо буда, барои рушду густариши ислом ва ҷомеаи мусулмонӣ пайи хидмат қарор доранд, бисёранд. «Танҳо қарзи имонӣ ва инсонии хеш медонем, дар ин даврае, ки вақти интихоб пеш омадааст, ҳамватанони азизамонро, ба ташхиси ҳушмандонаи роҳи ояндаамон, фардои сарзаминамон даъват кунем. Пас, мебояд, ки ҳар як мусулмон вақти интихоб илму дониш, ақлу заковатро рӯйи кор гирифта, барои фардои ободу осудаи Ватанамон ва сулҳу суботи он масъулиятро дар ҷойи аввал қарор бидиҳад. Ҳамагон бояд бидонанд, ки ислом ба ҳеҷ гуна ҳизб ниёз надорад. Ислом дар табиати худ фарогирандаи тамоми мусулмонон аст», - омадааст дар ин муроҷиатнома.

Раёсати Шӯрои уламо инчунин аз дасисаи доираҳои харобкору манфиатҷӯ дар иддае аз кишварҳои мусулмонӣ зикр кардааст, ки ҳамаи ин ваҳшоният бо номи ислом ва бо зикри исми мубораки Худои таборак ва таъоло сурат мегирад: «Ҷаҳони ислом асосан ба он ҷиҳат гирифтори инчунин фоҷеа гардидааст, ки ба арзишҳою муқаддасоти асили исломиамон хурофот, зоҳирбинию зоҳирписандӣ дар ислом таҳдид дорад. Ин чизи нав нест. Кӯшишҳои бо шиорҳои авомфиребонаи ба ном исломӣ қонеъ сохтани ғаризаҳои нопоки гурӯҳию шахсӣ ва ба манфиатҳои хеш истифода кардани ислом дар таърихи башарият бисёр буданд. Талошҳои мазкур имрӯз густаришу тақвияти бештар ёфтанд, ки заминаҳояш фақру нодорӣ, бесаводию тангназарӣ ва бехабарии иддае мусулмонон аз дини муқаддаси Ислом мебошанд».

Шӯрои уламо афзудааст, ки каломи худовандӣ кирдорҳои мазкурро маҳкум намуда, касонеро, ки миёни мусулмонон тафриқа эҷод мекунанд ва бо номи ислом аъмоли зиддиисломӣ содир менамоянд, «мушрикону мунофиқон» унвон гузоштааст ва мусулмононро даъват кардааст, то аз пайравӣ ба онҳо худдорӣ намоянд. «Худованд фармудааст, «аз зумраи касоне мабошед, ки дини Худоро пора-пора карданд ва фирқа-фирқа шуданд ва ҳар фирқае ба ҳарчи дошт, дилхуш буд». (Рум; 32).
Ҳамчунин Пайғамбари гиромии ислом дар ин маврид мегӯянд: «Касе, ки ҷудоӣ ва тафриқа меандозад, аз ҷумлаи мо нест».

«Бузургони гузаштаамон ҳам ба суханони «Каъба чӣ меравӣ? Дилеро дарёб» ва садҳо ҳикматҳои ҷовидонаи дигар ҷомеаи мусулмониро даъват ба исломи асил намуда, онҳоро аз нораво будани пайравии кӯркӯрона, авомфиребӣ ва зоҳирписандӣ дар ислом огоҳ сохтаанд», - омадааст дар муроҷиатномаи Шӯрои уламои Маркази исломӣ.

Масъулони Шӯрои уламо ба раҳбарии Сайидмукаррам Абдулқодирзода бо пахши муроҷиатнома ҳамчунин аз вуҷуди ҷунбишҳои исломӣ низ нигаронӣ кардаанд, ки дини исломро ба арсаи муборизаҳои сиёсӣ миёни қувваҳои мухталиф кашондаанд.


Шарҳи хонандагон +

Матолиби дигар:

Ҷавонон аз хуруфоту бесаводӣ ба ДИИШ мепайванданд

Ҷавонон аз хуруфоту бесаводӣ ба ДИИШ мепайванданд

Ҳаёти иҷтимоӣ, Хабарҳо, Ҷавонон ва варзиш, Номаҳои Шумо
Фатвои Шӯрои уламо: Тарғиби ақидаи Салафия тарғиби терроризм аст

Фатвои Шӯрои уламо: Тарғиби ақидаи Салафия тарғиби терроризм аст

Сиёсат, Хабарҳо, Ҳуқуқу амният
Барои ризои нафси худ исломро доғдор кардан аз ойини мусалмонӣ нест

Барои ризои нафси худ исломро доғдор кардан аз ойини мусалмонӣ нест

Сиёсат, Хабарҳо, Номаҳои Шумо
Фатвои Маркази исломии Тоҷикистон: 8 узре, ки ба сабаби онҳо хӯрдани рӯза и ...

Фатвои Маркази исломии Тоҷикистон: 8 узре, ки ба сабаби онҳо хӯрдани рӯза и ...

Хабарҳо, Маориф ва илм, ҲАНГОМА ПАҲЛАВОНОВА
Ба заъфи худ ғазо кунед!

Ба заъфи худ ғазо кунед!

Ҳуқуқу амният, ЗОКИРҶОН МУРОДОВ