Сарчашмаи зиндагии шоиста

Таъмини амнияти озуқаворӣ яке аз чор ҳадафи стратегии Ҷумҳурии Тоҷикистон ба шумор рафта, таҳқиқи масъалаҳои назариявии он барои мусбат амалӣ намудани он басо муҳим ва асосӣ мебошад. Ҷумҳурии Тоҷикистон афзалиятҳои миллии хешро дар асоси принсипҳои ҳамшарикӣ ва густариши ҳамкориҳои байналмилалӣ татбиқ менамояд ва пайваста барои устувор гардидани муносибатҳои мутақобилан муфиди иқтисодӣ дар минтақа ва дар сатҳи байналмилалӣ талош намуда истодааст.

Вобаста ба ин, Ҷумҳурии Тоҷикистон 22 сол қабл, яъне соли 2000 Эъломияи ҳазорсоларо дар радифи 192 кишвари олам ба тасвиб расонид ва Ҷумҳурии Тоҷикистон ҳамчун узви комилҳуқуқ ва ҷудонашавандаи ҷомеаи ҷаҳонӣ ба ин Эъломия ворид гардид. Самтҳои фаъолияти ҷомеаи ҷаҳонӣ, ки дар Эъломияи ҳазорсола инъикос ёфтаанд,бо афзалиятҳо ва ҳадафҳои миллии Тоҷикистон ҳамоҳанг мебошанд.

Бо ташаббуси бевоситаи Асосгузори сулҳу ваҳдати миллӣ-Пешвои миллат, Президенти кишвар муҳтарам Эмомалӣ Раҳмон барои фароҳам овардани замина ҷиҳати рушди минбаъдаи кишвар барномаи дарозмуҳлати иҷтимоию иқтисодӣ-Стратегияи миллии рушди Ҷумҳурии Тоҷикистон барои солҳои 2015- 2030 қаблул гардид, ки баҳри ба низом даровардани раванди рушди кишвар мусоидат менамояд. Стратегияи мазкур бо назардошти дурнамои дарозмуҳлат ва мутобиқ ба ҳадафҳои рушди ҳазорсола таҳия гардидааст. Инчунин, айни замон стратегияҳои миёнамуҳлати паст кардани сатҳи камбизоатӣ мавриди амал ва татбиқ қарор дорад.

Ҷумҳурии Тоҷикистон дар фазои сулҳу оромӣ бо дастгирӣ ва ҳидоятҳои Пешвои муаззами миллат муҳтарам Эмомалӣ Раҳмон кӯшиши зиёд ба харҷ дода истодааст, ки дар ояндаи наздик нишондиҳандаҳои муайянкунандаи амният ва бехатарии иқтисодии мамлакати азизамон - Тоҷикистонро беҳтар намуда, дар маҷмуъ ба ҳар фарди ҷомеа шароити зисту зиндагонии мувофиқ ва сазоворро фароҳам созад.

Баҳодур Имомализода,
омӯзгори факултети гумрук ва таҳлили
иқтисодии ДДБ ба номи Носири Хусрав