Мулоқоти Давлаталӣ Алимов бо Озан Севимли

Имрӯз, 19 сентябр, раиси вилояти Хатлон Давлаталӣ Саид намояндаи доимии Бонки Ҷаҳонӣ дар Ҷумҳурии Тоҷикистон Озан Севимлиро ба ҳузур пазируфт.

Мулоқоти мазкур дар ҳошияи маросими ифтитоҳи марҳилаи якуми татбиқи Лоиҳаи сармоягузории обтаъминкунӣ ва беҳдошт дар шаҳри Бохтар сурат гирифт.

Раиси вилоят Давлаталӣ Саид аз сатҳи ҳамкории намояндагии Бонки Ҷаҳонӣ бо Мақомоти иҷроияи ҳокимияти давлатии вилояти Хатлон изҳори қаноатмандӣ намуда, оид ба имкониятҳои вилоят ва шароити мусоид барои татбиқи ислоҳот, сармоягузорӣ, рушди кишоварзӣ, обёрӣ, обтаъминкунӣ, истеҳсоли маҳсулот ва саноат, рушди сайёҳӣ сухан кард.

Давлаталӣ Саид бо Озан Севимли доир ба натиҷаҳои тадқиқот оид ба хизматрасонии обтаъминкунӣ ва канализатсия дар вилояти Хатлон мубодилаи афкор намуданд. Қайд гардид, ки ҷиҳати таъмини самарабахшии сармоягузорӣ дар доираи лоиҳаи обтаъминкунӣ, беҳдошт ва партовҳо бояд механизмҳои санҷидашудаи ҳамкорӣ бо шаҳрвандон, ҷамъиятҳо, шарикони рушд ва мақомоти дахлдори давлатӣ дар ноҳияҳои мавриди ҳадаф (Кӯшониён, Вахш, Ҷ. Балхӣ, Дӯстӣ ва Ҷайҳун) ба кор бурда шаванд.

Ҷонибҳо ҳамчунин оид ба имкони амалӣ намудани як қатор тадбирҳо дар самти рушди соҳибкорӣ, таъсиси ҷойҳои корӣ, истеҳсоли маҳсулоти инноватсионӣ, баланд бардоштани иқтидори содиротии мамлакат, инчунин нақши неруи созандаи бахши хусусӣ дар рушди иқтисодии вилояти Хатлон ибрози назар намуданд.

Дар идомаи мулоқот инчунин, масъалаҳои густариши ҳамкориҳои дуҷониба дар бахши технологияҳои нав ва дурнамои рушди равобит мавриди муҳокима қарор дода шуд.

Қобили зикр аст, ки Ҷумҳурии Тоҷикистон соли 1993 узви Бонки Ҷаҳонӣ гардида, соли 1996 дар кишварамон намояндагии Бонки ҷаҳонӣ таъсис ёфтааст. Аз соли 1996 Бонки Ҷаҳонӣ дар Ҷумҳурии Тоҷикистон ба маблағи тақрибан 850 миллион доллари ИМА лоиҳаҳои гуногунро амалӣ намудааст, ки сеяки ин маблағ ба рушди соҳаи кишоварзӣ ва деҳот нигаронида шудааст.