Дар як сатр
» » «Корвони маърифат» ба роҳ баромад

«Корвони маърифат» ба роҳ баромад

1-02-2017, 15:43

«Корвони маърифат» ба роҳ баромад


Яке аз иқдомҳои ҷолиб ва пурсано дар роҳи иҷрои дастуру ҳидоятҳои Паёми навбатии Президенти мамлакат мухтарам Эмомалӣ Раҳмон ба Маҷлиси Олӣ ташкили «Корвони маърифат»-и вилоят мебошад, ки он ба истиқболи 20-солагии Ваҳдати миллӣ бахшида шуда, дар нақша-чорабиниҳои имсолаи мақомоти иҷроияи ҳокимияти давлатии вилоят мақом пайдо намудааст. Тибқи нақша «Корвони маърифат» аз маркази вилоят 28 январ ба роҳ баромада, аввалин вохӯрии худро бо сокинони ноҳияи Абдураҳмони Ҷомӣ оғоз бахшид.

Вобаста ба ҳадафи «Корвони маърифат», мақомоти иҷроияи ҳокимияти давлатии ноҳия нақшаеро тартиб дод, ки мутобиқи он дар ҷамоатҳои шаҳраку деҳоти ноҳия таҳти унвони «Саломатӣ-гавҳари ноёб», «Оилаҳои намунавӣ», мусобиқоти варзишӣ, намоишҳои фарҳангӣ-театрӣ, аксияи иттилоотӣ, вохӯрӣ бо адибон ва амсоли ҳамин, дигар чорабиниҳо мегузашт. Дар ҳайати «Корвони маърифат», ки ба ноҳия расид, адибону олимон, рӯзноманигорон, маорифчиён, кормандони соҳаи тандурустӣ ва аҳли фарҳанг шомил буданд. Муҳтавои барномаи корвониён аз фаҳмондадиҳии паҳлуҳои ҳадафноки Паём ба омма ибтидо гирифта, ҳамзамон, музаффариятҳои кишвари соҳибистиқлол дар давоми 20 соли ваҳдатсароӣ, омилҳои расидан ба ҳадафҳои барномаҳои стратегии мамлакат, аз қабили истиқлолияти эенергетикии кишвар, раҳоӣ аз бунбасти коммуникатсионӣ ва таъмини амнияти озуқавории мамлакат бо далелҳои амиқ баррасӣ шуд ва ахиран, байни меҳмонону мизбонон суҳбати гарму доманадор аз ба роҳи иқбол гом гузоштани қонунҳои миллӣ ҷиҳати танзими расму оин, масъулияти падару модар дар роҳи таълиму тарбия, тағйиротҳои назаррас дар Конститутсияи Ҷумҳурии Тоҷикистон, Кодекси оила ва ғайра доир гардид. Дар ин замина эҷодкорону ҳунармандон бо намунаҳои ашъору барномаҳои ҷолиби худ хотири ҳамагонро шод гардониданд.
«Корвони маърифат» ба роҳ баромад

Ба ҳамин мақсад, дар маркази ноҳия Раёсати идораи сабти асноди ҳолати шаҳрвандӣ маҳфили «Оилаи намунавӣ» доир намуд, ки дар он аз ҷамоатҳои шаҳраку деҳот оилаҳои рӯзгордидаю обрӯманд, фарзандони солеҳу соҳибмаълумотдошта, инчунин, оилаҳои ҷавон даъватӣ буданд. Дар суҳбате, ки меҳмонон бо оиладорони ду насл доштанд, пеш аз ҳама он нукта падид омад, ки дар мустаҳкамии оила, сараввал, меҳру муҳаббати самимӣ, тарафайн ва ҳамдигарфаҳмии комил мебояд, ки зиндагӣ ширину гуворо гузарад. Сониян, дар мавриди фарзандони солиму солеҳ ва боақлу заковат ба воя расидан зарур ва ҳатмист, ки байни издивоҷкунандагон пайвандии хешутабории наздик набошад. Пирони рӯзгордидаю ҷавони хушиқбол, ки зиндагии шоистаро пеш мебаранд, ҳамчунин, раванди минбаъд омӯзиши ҳатмии Конститутсия ва қонунҳои Ҷумҳурии Тоҷикистон «Дар бораи танзими анъана ва ҷашну маросимҳо дар Ҷумҳурии Тоҷикистон», «Дар бораи масъулияти падару модар дар таълиму тарбияи фарзанд»-ро дар барномаҳои муассисаҳои таълимӣ, ки Сарвари давлат дар ироаи Паёми имсолаашон ба Вазорати маориф ва илм супориш доданд, муҳимтарин нуктаи ин ҳуҷчати зиндагисоз маънидод намуда, боз аз он изҳори хурсандӣ доштанд, ки соли 2017 Соли ҷавонон эълон гардидааст.

Дар Ҷамоати деҳоти Калинин бошад, чорабинии пурмуҳтаво таҳти унвони «Аксияи иттилоотӣ ва мулоқот бо адибон» бо иштироки хонандагону омӯзгорони муассисаҳои таълимии №4, 14 55 ва сокинони деҳот баргузор гардид. Чун анъана, ба истиқболи меҳмонони «Корвони маърифат» дар ҳавлии мактаб дастовардҳои мактаббачагон, аз қабили дӯзандагию бофандагӣ, гилембофӣ, дуредгарӣ, рассомӣ, навоварии техникҳои ҷавон, дастони моҳир, бозёфтҳои кишваршиносон ба намоиш гузошта шуда буд. Ҳамчунин, дар намоишгоҳ китобҳои арзандаи адибони ҷумҳурӣ, вилоят ва маҷмӯаи шогирдонаи қаламкашони ноҳия, шумораҳои моҳи январии рӯзномаи ноҳиявӣ гузошта шуда буд. Аз саҳарии барвақт радиои сайёри ноҳия бо гуфторҳои ҷолиб меҳмононро “хайра мақдам” гуфта, хабарҳои тозаи ноҳияро мешунавонд.

Ба меҳмонии мактаббачагону аҳли деҳот адибони вилоят Рустами Хомарахш, Ғаффоралӣ Сафар, Акрами Ризом, ҳунармандон Шамси Афғон, Муроди Одина бо сарварии котиби Иттифоқи нависандагони Тоҷикистон дар шаҳри Қӯргонтеппа Озар (Миралӣ Салимов) ташриф оварда буданд.
«Корвони маърифат» ба роҳ баромад

Адибон, сараввал, аз дастуру ҳидоятҳои Асосгузори сулҳу ваҳдати миллӣ-Пешвои миллат, Президенти мамлакат муҳтарам Эмомалӣ Раҳмон, ки дар Паёми имсолаи худ ба Маҷлиси Олӣ дарҷ гардидааст, ҳозиринро фаҳмонданд ва аз тозатарин ахбори дохилу хориҷи кишвар ва ҷаҳон паём доданд. Сипас, шоирону нависандагони шинохта аз ашъори тозаэҷоди худ дар васфи Ватан, Тоҷикистон, рамзҳои давлатӣ, ишқи поки ҷавонӣ намунаҳо қироат намуданд.

Дар чорабинӣ аъзои маҳфили адибони ноҳия Ҳикматулло Ҷӯраев, Ғиёсиддин Наботов, Шарифамоҳи Шарифӣ, Гулмурод Боймуродов, Ҳасани Қандил, Суман Усмон аз чакидаҳои шогирдонаи худ, ки дар васфи ватан-модар, сулҳу ваҳдат, истиқлолият, Пешвои миллат, ишки поки ҷавонӣ сурудаанд, пораҳо манзур намуданд. Меҳмонон аз он хурсандӣ изҳор намуданд, ки дар ноҳия маҳфили адабӣ фаъолият дорад ва аъзои он то дараҷае дар роҳи эҷод муваффақ ҳам гаштанд.

Боиси зикр аст, ки дар ин корвон кормандони соҳаи тандурустии вилоят шомил буданд ва ба аҳолии мавзеҳои дурдастарини ноҳия хизмати тиббӣ расониданд.

Ҳамин тариқ, дар дигар ҷамоатҳои деҳот низ чорабиниҳо дар сатҳи баланди масъулиятпа-зирӣ ва бо хурсандии беинтиҳои аҳли заҳмат, ҷавонону наврасон доир гардид.
«Корвони маърифат» ба роҳ баромад

Дар ҷамъомади ҷамъбастӣ, ки дар Кохи фарҳанги ноҳия баргузор гардид, муовини раиси вилоят Хидирзода Махфират суханронӣ намуда, бори дигар ҷиҳати ҳадафҳои ваҳдатбаёни «Корвони маърифат» равшанӣ андохта, афзуд, ки қадами аввали корвониёни маърифатсаро дар ноҳияи Абдураҳмони Ҷомӣ бо як ҷаҳон таассуроти хуҷастаи меҳмонону мизбонон гузашт ва чунин чорабиниҳои муҳим дар сатҳи вилоят баъд аз ин ҳам баргузор хоҳад гашт. Анҷоми чорабинии «Корвони маърифат» бошад, дар рӯзҳои ҷашноройии 20-солагии Ваҳдати миллӣ дар маркази вилоят- шаҳри Қӯрғонтеппа дар назар аст.

ВАХШОНА,
И. ҲАСАНОВ,
«Хатлон»



Шарҳи хонандагон +

Матолиби дигар:

Вакилон Паёмро шарҳ медиҳанд

Вакилон Паёмро шарҳ медиҳанд

Хабарҳо, Ҳокимияти давлатӣ, ИСМАТУЛЛО ҲАСАНОВ
«Корвони Маърифат» аз ноҳияи Абдураҳмони Ҷомӣ шурӯъ мешавад

«Корвони Маърифат» аз ноҳияи Абдураҳмони Ҷомӣ шурӯъ мешавад

Хабарҳо, Ҳокимияти давлатӣ, Фарҳанг ва адабиёт, ҲАНГОМА ПАҲЛАВОНОВА
«Шоми ваҳдат» ва маҳфили адибони Хатлонзамин дар ноҳияи Роштқалъа

«Шоми ваҳдат» ва маҳфили адибони Хатлонзамин дар ноҳияи Роштқалъа

Хабарҳо, Фарҳанг ва адабиёт
«Корвони ваҳдат»-и Хатлон дар ВМКБ

«Корвони ваҳдат»-и Хатлон дар ВМКБ

Хабарҳо, Фарҳанг ва адабиёт, ҲАНГОМА ПАҲЛАВОНОВА
Рӯ ба рӯ бо мардум

Рӯ ба рӯ бо мардум

Ҳаёти иҷтимоӣ, Хабарҳо, Ҷавонон ва варзиш, Маориф ва илм, АСАЛМО САФАРОВА