23 намуди нави маҳсулот истеҳсол шуд

Имсол корхонаҳои саноатии вилояти Хатлон истеҳсоли 23 намуди нави маҳсулоти саноатиро ба роҳ монданд.

Аз шуъбаи энергетика ва саноати дастгоҳи раиси вилоят зимни тасдиқи ин хабар ба рӯзномаи “Хатлон” иттилоъ доданд, ки айни ҳол дар вилоят 209 намуди маҳсулоти саноатӣ истеҳсол мегардад. Дар нимаи якуми соли ҷорӣ истеҳсоли 123 намуди маҳсулоти саноатӣ (58,9%) афзоиш ёфтааст.

Қобили зикр аст, ки соли равон дар вилоят 83 корхона ва як коргоҳи нави истеҳсолӣ ба истифода дода шудааст, ки аллакай ба маблағи 31,7 миллион сомонӣ маҳсулот истеҳсол намудаанд. Ин таносуб дар қиёс ба ҳамин давраи соли гузашта як баробар (40 корхона) зиёд мебошад.

Ҳамин тариқ, шумораи умумии корхонаҳои саноатӣ дар вилояти Хатлон ба 792 адад расид, ки дар қиёс ба нимаи якуми соли гузашта 118 корхона бештар аст.