Хатлон дар ҷамъоварии ғалла пешсаф аст

Дар ҷумҳурӣ маъракаи ҷамъоварии ҳосили ғалладонагӣ бомаром идома дошта, то5 июни соли равон аз майдони 31 ҳазору 480  гектар 110 ҳазору 99 тонна маҳсулот ҷамъоварӣ гардидааст.

Тавре Вазорати кишоварзии Ҷумҳурии Тоҷикистон иттилоъ медиҳад, бо мақсади беталаф ва сари вақт ҷамъоварӣ намудани ҳосил ситоди махсуси ҷумҳуриявӣ таъсис дода шуда, ба кишоварзон дар раванди дарав кумак мерасонад.

Бино ба маълумот, соли 2026 дар хоҷагиҳои ҷамоавӣ ва деҳқонии кишвар  дар  майдони 293  ҳазору 702  гектар  кишти  зироатҳои ғалладонагӣ гузаронида шудааст. Аз ин ҳисоб, 195 ҳазору 106 гектарро кишти гандум ташкил медиҳад. То имрӯз аз 25 ҳазору 426 гектар майдон гандум даравида шуда, 92 ҳазору 712 тонна ҳосил ба даст омадааст. Ҳосилнокӣ ба ҳисоби миёна аз ҳар гектар40 сентнерро ташкил медиҳад.

Мутахассисони соҳа таъкид менамоянд, ки ғалладонагиҳо, аз ҷумла гандум, ҷав, лӯбиё, нахӯд, мош, шолӣ ва ҷуворимакка аз муҳимтарин маҳсулоти ғизоии аҳолӣ ба шумор рафта, рушди истеҳсоли онҳо барои таъмини амнияти озуқавории кишвар аҳамияти стратегӣ дорад.

Ба иттилои вазорат, вилояти Хатлон бо назардошти шароити мусоиди иқлимӣ яке аз минтақаҳои асосии парвариши ғалладонагӣ дар мамлакат маҳсуб ёфта, айни замон дар ҷамъоварии ҳосили ғалла байни минтақаҳои ҷумҳурӣ мавқеи пешсафро ишғол менамояд.