Суди вилояти Хатлон ҳукми муттаҳамони қатли бераҳмонаи аъзои як оила дар Ҷайҳунро содир кард

Бо ҳукми Суди вилояти Хатлон, Қиёмиддин Насриддинов ва Маҳмадғаюр Хайбуллоев барои содир намудани ҷинояти дар якчанд банди моддаҳои 32 (тайёр кардан ва сӯиқасд ба ҷиноят), 104 (одамкушӣ), 244 (дуздӣ) ва 255 (қасдан нест кардани молу мулк)-и Кодекси ҷиноятӣ пешбинигардида гунаҳкор дониста, ба ҷазои якумра - маҳрум сохтан аз озодӣ бо нигоҳдорӣ дар колонияҳои махсус маҳкум гардиданд.

Суд, ҳамчунин Адолат Шерматоваро дар айни ҳамин ҷиноятҳо гунаҳкор дониста, ба 28 соли маҳрумият аз озодӣ маҳкум намуд.

Ёдовар мегардем, ки хабари куштори 4 узви як хонавода дар ноҳияи Ҷайҳуни вилояти Хатлон дар нимаҳои моҳи июни соли 2021 сокинонро такон дода буд.

Рӯзи 12-уми июни соли гузашта Вазорати корҳои дохилӣ хабар дод, ки шахсони ношинос ба хонаи Аҳлиддин Маҳмадови 39-сола даромада, қасди куштори 6 нафар аъзои оиларо карданд.

Онҳо бо табар ба чор фарзанд, худи Аҳлиддин  Маҳмадову ҳамсараш дарафтоданд ва баъди ҳамла хонаро оташ зада, аз ҷойи ҳодиса ғайб заданд. Ҳамсар ва як писари Маҳмадов зинда монданд, вале худи ӯ бо се фарзандаш аз зарби табар ҳалок шуданд.

Субҳи 12 июн, дар деҳаи Меҳнатободи ноҳияи Ҷайҳун ҳамсояҳо шоҳиди баланд шудани дуд аз хонаи Аҳлиддин шуданд. Онҳо фикр карданд, ки сӯхтор сар задааст ва ба хомӯш кардани он шитофтанд, аммо ҳодисаи мудҳиштаре рух дода буд. Дар ду ҳуҷра 4 узви хонавода беҳаракат мехобиданд ва осори хун дида мешуд.

Дертар маълум гардид, ки се узви ин хонавода дар ҷойи ҳодиса ба ҳалокат расида, худи соҳибхона пас аз ним соати интиқол ёфтан ба бемористон ҷон аз даст дод.

Ҳангомаи ИСМАТ, “Хатлон”