ОВЕЗАҲОИ ОГОҲКУНАНДА ДАР МАВЗЕЪҲОИ САЁҲИИ ЛЕВАКАНТ

Бо ташаббуси Сарраёсати ҳифзи муҳити зист дар вилояти Хатлон дар мавзеъҳои саёҳии шаҳри Левакант овезаҳои огоҳкунанда насб карда шуданд.

Гуфта мешавад, ки ҳадафи асосии ин иқдом таъмини тозагию ободии муҳити зист ва баланд бардоштани маърифати экологии аҳолӣ мебошад.

Овезаҳои насбшуда сокинон ва меҳмонони шаҳрро ба риояи қоидаҳои оддии экологӣ даъват намуда, аз онҳо талаб мекунанд, ки ҳангоми истироҳат ба табиат эҳтиром гузошта, аз партофтани партовҳо худдорӣ намоянд.

Масъулон бар он назаранд, ки чунин тадбирҳо метавонанд дар ташаккули муносибати масъулона ба муҳити зист саҳми муассир гузоранд ва фарҳанги тозагидориро миёни аҳолӣ тақвият бахшанд.

Рамазони МИРЗОМИДДИН, "Хатлон"