СУДИ ВИЛОЯТИ ХАТЛОН 14 ПАРВАНДАИ МАЪМУРИРО БЕКОР КАРДААСТ

Имрӯз, 23 июл, дар шаҳри Бохтар нишасти матбуотии Суди вилояти Хатлон доир гардид.

Нуриддин Расулзода, раиси суди вилоят, иттилоъ дод, ки дар нимаи якуми соли ҷорӣ ба Суди вилояти Хатлон дар марҳилаи якум 107 парванда ворид гардидааст, ки 17 парванда бозмонда аз соли 2023 мебошад. 78 парванда нисбати 121 нафар баррасӣ гардида, алайҳи 100 нафар ҷазои аз озодӣ маҳрум сохтан татбиқ гардидааст, ки аз онҳо 4 нафар ноболиғ ва 2 нафар шаҳрвандони хориҷӣ мебошанд.

- Дар давраи ҳисоботӣ ба раёсати Суди вилояти Хатлон 21 парвандаи ҳуқуқвайронкунии маъмурӣ бо эътирозҳо ворид гардида, аз ин 12 эътирози раиси Суди Олии Ҷумҳурии Тоҷикистон, 5 эътирози прокуророн мавриди баррасӣ қарор гирифтаанд. Дар натиҷа се қарор тағйир дода шуда, 14 қарори маъмурӣ бекор карда шудааст, - гуфт Н. Расулзода.

Толиб Толибзода, “Хатлон”