Хатлон. Ҷинояти коррупсионӣ 31 адад зиёд шудааст

Дар шаш моҳи соли равон аз ҷониби кормандони Раёсати Агентии назорати давлатии молиявӣ ва мубориза бо коррупсияи Ҷумҳурии Тоҷикисон дар вилояти Хатлон дар 92 ташкилоту муассисаҳо ва корхонаҳои вилоят тафтишу санҷишҳои молиявӣ гузаронида шудааст.

Дар давраи санҷиш 9 737 289 сомонӣ зарари молиявӣ ошкор карда шуда, аз ин 8 688 303 сомонӣ барқарор карда шудааст. Дар ин бора Карим Иброҳимзода, сардори Раёсати Агентии назорати давлатии молиявӣ ва мубориза бо коррупсияи ҶТ дар вилояти Хатлон дар нишасти матбуотии хеш ба хабарнигорон иттилоъ дод.

Ҳамчунин, дар ин давра 247 ҷинояти коррупсионӣ ва иқтидори характери коррупсионидошта ошкор карда шудааст, ки дар муқоиса ба ҳамин давраи соли гузашта 31 ҷиноят зиёд мебошад. Аз ин шумора 90 ададашро ҷинояти вазнин ташкил медиҳад. Маблағи умумии зарар аз рӯи ҷиноятҳои ошкоргардида 11 248 684 сомониро ташкил медиҳад, ки то давраи ҷамъбастӣ 5 846 071 сомонӣ рӯёнида шудааст.

Ҳамзамон, иттилоъ дода шуд, ки то давраи ҳисоботӣ 232 ҳуқуқвайронкунии маъмурӣ вобаста ба коррупсия ошкор карда шудааст. Инчунин, то ин давра ба раёсат 309 аризаю муроҷиатҳои шаҳрвандон ворид шудааст, ки баъди баррасӣ қарорҳои дахлдор қабул карда шудааст.