БИЗНЕС-ФОРУМИ ДОИРАҲОИ САРМОЯГУЗОРИИ ХАТЛОНУ ХУРОСОНИ РАЗАВӢ ДАР МАШҲАД

Муҳаррир: Суҳроби Рустам аз 19 май, Бахш: Ҳокимияти давлати / Слайдер / Матлабҳои охирин / Хабари рӯз / Иқтисоду тиҷорат / Хабарҳо, Боздид 274

Дар утоқи бозаргонии шаҳри Машҳад бо иштироки раисони вилоятҳои Хатлони Тоҷикистон Давлаталӣ Саид ва Хуросони Разавии Эрон Яъқубалӣ Назарӣ бизнес-форуми доираҳои сармоягузориву тиҷоратии ду кишвар баргузор гардид.

Қайд гардид, ки раҳбарияти ҳар ду вилоят тамоми имконотро баҳри тавсеа ва таъмиқи ҳамкориҳои мутақобилан судманд ба кор мебаранд. Вилоят яке аз марказҳои рушдёфтаи кишоварзию саноатии Ҷумҳурии Тоҷикистон ба ҳисоб рафта, дорои имконоти фаррохи ҳамкориҳо мебошад.

Дар ҳамоиш намояндагони вилояти Хатлон дар мавриди зарфиятҳои иқтисодӣ, сайёҳӣ, дастгирии давлатии бахши хусусӣ ва сармоягузорӣ дар вилоят ба доираҳои тиҷоратии Эрон маълумоти муфассал пешниҳод карданд.

Гуфта шуд, ки дар вилоят соҳаи кишоварзӣ яке аз самтҳои афзалиятноку пешбаранда маҳсуб ёфта, наздик ба 70 ҳазор хоҷагии кишоварзӣ фаъолият дорад ва ҳаҷми истеҳсоли маҳсулоти кишоварзии вилоят соли гузашта ба зиёда аз 2,5 миллиард доллари амрикоӣ баробар шуд.
Раиси вилояти Хатлон Давлаталӣ Саид зимни сухани худ зикр намуд, ки ҳиссаи вилоят дар маҷмӯи маҳсулоти дохилии кишоварзии мамлакат 52 фоизро ташкил мекунад. Аз ҷумла, 65,1 фоизи ғалладона, 69,4 фоизи пахта/пумба, 59,6 фоизи сабзавот, 78,8 фоизи полезиҳо, 48,7 фоизи мева, 40,5 фоизи ангур, 56,7 фоизи гӯшт, 50,8 фоизи шир ва 75,3 фоизи ҳаҷми истеҳсоли моҳии кишвар дар вилояти Хатлон тавлид гардидааст.

Ҳамасола дар вилоят беш аз 250 ҳазор тонна пахта, 2,5 миллион тонна меваю сабзавот, ангур ва зироатҳои полезӣ, инчунин 1 миллион адад пӯсти чорвои калону майда ва 6 ҳазор тонна пашм истеҳсол карда мешавад.

Кишоварзони вилоят ҳамасола ба кишварҳои хориҷи наздику дур беш аз 100 ҳазор тонна маҳсулоти кишоварзӣ содирот мекунанд.
Ҳоло дар ҳудуди вилояти Хатлон 66 сардхона бо иқтидори умумии ғунҷоишаш 24 ҳазор тонна мавриди истифода қарор дорад. Дар вилояти Хатлон аз ҳисоби мавқеи ҷуғрофӣ ва хусусияти иқлиму хокаш имконияти дар як сол 3-4 маротиба гирифтани ҳосил мавҷуд аст.

- Бо мақсади дар амал татбиқ намудани ҳадафҳои муайянгардидаи Ҳукумати мамлакат, аз ҷумла саноатикунонии босуръат, дар самти ҷалби сармояи мустақими ватаниву хориҷӣ, таъсиси ҷойҳои нави корӣ, фароҳам овардани шароити мусоиди инфрасохторӣ ва рушди соҳаҳои афзалиятнок тамоми шароит фароҳам оварда шудааст, - идома дод раиси вилоят Давлаталӣ Саид. - Саноати вилоятро 719 корхонаю коргоҳҳои хурду калон намояндагӣ мекунанд, ки беш аз 200 намуди маҳсулоти саноатӣ истеҳсол менамоянд. Дар вилоят саноати кӯҳӣ, энергетика, саноати хӯрокворӣ, масолеҳи сохтмонӣ ва саноати сабук рушд ёфтааст. Дар вилояти Хатлон беш аз 90 фоизи ҳаҷми истеҳсоли барқи ҷумҳурӣ истеҳсол карда мешавад.

Раиси вилояти Хатлон бо пешниҳодоти мушаххас аз доираҳои тиҷоратӣ ва ширкатҳои истеҳсолии Хуросони Разавӣ барои роҳандозии ҳамкориҳои густарда дар бахши коркарди пурраи пахта дар дохили кишвар, ресандагӣ, бофандагӣ ва дӯзандагӣ, таъсиси корхонаҳои муштараки Тоҷикистону Эрон оид ба истеҳсоли техникаю таҷҳизоти кишоварзӣ даъват ба амал овард.

“Бо дарназардошти мавҷудияти захираҳои бойи гиёҳҳои шифобахш, аз соҳибкорони эронӣ даъват мекунем, ки таъсиси корхонаҳои муштараки дорусозиро сармоягузорӣ намоянд”, - афзуд Давлаталӣ Саид.

Раиси вилояти Хатлон таъкид намуд, ки рушди ҳамкориҳо миёни бахшҳои хусусиву давлатӣ, ҷалби сармоя, таъсиси корхонаҳои муштараки саноатӣ, робитаҳои мустақими минтақаҳои озоди иқтисодӣ ва шаҳракҳои саноатии ду кишвар аз самтҳои авлавиятдори ҳамкориҳо дониста мешавад.

Дар форум қайд гардид, ки то оғози соли 2023 ҳаҷми сармояи хориҷии ба вилояти Хатлон воридшуда 1,5 миллиард долларро ташкил медиҳад, ки 1,4 миллиард доллари он сармояи мустақими хориҷӣ аст ва қариб 20%-аш ба Эрон рост меояд.

Масъулони Минтақаҳои озоди иқтисодии “Данғара”, “Панҷ” ва “Кӯлоб” низ дар ҳамоиш доир ба шароити фаъолият дар МОИ сухан карда, аз ҷумла таъкид намуданд, ки дар ҳудуди минтақа фаъолияти корхонаҳо аз ҳама намуди молиёт озод буда, воридоту содироти ҳама намуди маҳсулот аз пардохтҳои гумрукӣ озод мебошанд.

Доир ба зарфиятҳои вилояти Хуросони Разавӣ гуфта шуд, ки ин минтақа дар Эрон аз ҷиҳати истеҳсоли гӯшти мурғ дар мақоми чорум ва истеҳсоли тухми он дар мақоми дувум қарор дорад. 75%-и заъфарони дунё дар Хуросони Разавӣ мерӯяд. Дар қаламрави ин вилоят 5 шаҳраки саноатӣ ва беш аз 3000 корхонаи саноатӣ фаъолият доранд.

Пас аз қисмати муаррифии зарфиятҳо, нимаи дуюми рӯзи 17 май мулоқотҳои инфиродии сармоягузорону соҳибкорони тоҷику эронӣ дар формати В2В сурат гирифт. Дар натиҷаи гуфтумонҳо миёни доираҳои соҳибкории Хатлону Хуросони Разавӣ 15 шартномаи ҳамкорӣ баста шуд.

Дар баробари ин, миёни Минтақаҳои озоди иқтисодии ҳудуди вилояти Хатлон ва корхонаву ширкатҳои Хуросони Разавӣ 9 созишнома оид ба бунёди корхонаҳои саноатӣ, истеҳсоли қаннодӣ, масолеҳи сохтмонӣ, истеҳсоли таҷҳизоту мошинолот, доруворӣ, истеҳсоли дастгоҳҳои коркарди партовҳои сахти маишӣ, истеҳсоли сутунпояҳои чароғи барқӣ ба маблағи умумии 41 миллион доллари амрикоӣ ба имзо расид.

Намояндагони бахши хусусӣ ва марказҳои илмию саноатии вилояти Хуросони Разавӣ ҷиҳати татбиқи лоиҳаҳои муштараки Тоҷикистону Эрон дар соҳаҳои истихроҷи маъданҳо, сохтмон, интиқоли борҳо, таҳвили фанновариҳои навин ва дар дигар бахшҳои мутақобилан судманд алоқамандии худро нишон доданд.

Қобили зикр аст, ки расо як сол пеш, 30 майи соли 2022, дар шаҳри Душанбе дар ҳузур ва бо иштироки сарони ду давлат муҳтарам Эмомалӣ Раҳмон ва муҳтарам Сайид Иброҳим Раисӣ Ёддошти тафоҳум байни Мақомоти иҷроияи ҳокимияти давлатии вилояти Хатлони Ҷумҳурии Тоҷикистон ва Ҳукумати вилояти Хуросони Разавии Ҷумҳурии Исломии Эрон оид ба ҳамкориҳои иқтисодӣ, фарҳангӣ, илмӣ ва сайёҳӣ ба имзо расида буд.

http://khatlon-ruznoma.tj/