Боздид аз боғи интенсивии “Бобои Шамс” дар ноҳияи Шамсиддин Шоҳин ва иштирок дар ҷашни Меҳргони вилояти Хатлон

23 октябр Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар доираи сафари корӣ дар ноҳияи Шамсиддин Шоҳин аз боғи интенсивии “Бобои Шамс” дидан намуданд.

Боғи мазкур дар доираи татбиқи ҳадафи стратегии мамлакат-таъмини амнияти озуқавории кишвар бунёд карда шуда, хоҷагидорон бо истифода аз таҷрибаи пешқадам ва риояи қоидаҳои агротехникӣ ҳамасола ҳосили баланд ба даст оварда, дар баробари таъмини аҳолии ноҳия бо меваҳои хушсифат ба хориҷи мамлакат низ содирот менамоянд.

Боғи интенсивии “Бобои Шамс” дар ҳудуди деҳоти Шӯроободи ноҳия ҷойгир буда,  дар масоҳати 2,4 гектар замин бунёд карда шудааст. Дар боғ 2 ҳазору 350 ниҳоли дарахтони мевадиҳандаи интенсивӣ парвариш карда мешавад.

Боғ бо ташаббуси бобои Шамс дар асоси дастуру супоришҳои Пешвои миллат муҳтарам Эмомалӣ Раҳмон дар самти истифодаи самараноки замин дар соли 2019 бунёд ёфта, соли сеюм аст, ки ба ҳосил даромадааст.

Тавассути пойгоҳи обкашии барқӣ ва бо тарзи қатрагӣ парвариши дарахтон ба роҳ монда шудааст, ки дар таҷрибаи ҷаҳонӣ пешқадамтарин дониста мешавад. 

Бо мақсади самаранок истифода шудани замин саҳмдорон дар байни қатори дарахтон сабзавот коридаанд, ки майдони 0,20 гектарро дар бар мегирад.

Ҷиҳати нигоҳдории беталафи меваву сабзавот масъулини хоҷагӣ ба бунёди сардхона бо ғунҷоиши 250 тонна оғоз намудаанд, ки минбаъд ҳосили боғ дар он ба муддати дароз нигоҳдорӣ карда мешавад.

Сарвари давлат зимни шиносоӣ бо дастовардҳои хоҷагидорон ба фаъолияти назарраси онҳо баҳои баланд дода, ҷиҳати боз ҳам самаранок истифода намудани замин, ки кафили таъмини амнияти озуқаворӣ мебошад ва дар шароити кунунӣ хеле ҳам саривақтист дастуру ҳидоятҳои мушаххас доданд.

Пас аз боздиди боғи интенсивӣ Президенти Ҷумҳурии Тоҷикистон муҳтарам Эмомалӣ Раҳмон дар ҷашни Меҳргон, ки дар боғи мазкур баргузор гардид, иштирок намуданд.

Меҳргон яке аз ҷашнҳои куҳантарини мардуми ориёнажод буда, бо шарофати Истиқлолияти давлатӣ ва ибтикори Пешвои миллат дар Тоҷикистон дар сатҳи давлатӣ ҷашн гирифта мешавад.

Ба таври расмӣ таҷлил намудани ҷашни мазкур далели он аст, ки дар Тоҷикистон ба арзишҳои гузаштаи фарҳангӣ арҷ мегузоранд.

Меҳргон ҷашни ҷамъоварии ҳосил, фаровонӣ, шодиву нишот, дӯстиву рафоқат ва меҳру садоқат аст.

Дар ҷашнгоҳ аҳли заҳмат дастранҷи худро, аз қабили меваву сабзавот, ғалладонагӣ, полезӣ ва ғайра ба намоиш гузошта буданд.


Дар намоишгоҳ деҳқонон дастовардҳои кишоварзии худро дар шаклҳои хеле ҳам ҷолибу диданӣ, аз қабили манораҳо аз меваву сабзавот ва ғалладонагиҳо манзури иштирокчиён намуданд.

Пешвои миллат зимни боздид аз намоишгоҳ ба масъулин ҷиҳати боз ҳам беҳтар намудани фаъолият, гирифтани чанд ҳосил аз як замин ва дар ин баробар таъмини амнияти озуқаворӣ дастуру ҳидоятҳои мушаххас доданд.

http://www.president.tj/