Қ. Ҳакимзода. “Камбудиҳо бояд дар ноҳия сари вақт бартараф карда шаванд”

Раиси вилояти Хатлон Қурбон Ҳакимзода баъд аз шиносоӣ аз рафти корҳои сохтмонӣ дар коргоҳои истеҳсолӣ, биноҳои баландошёна ва корҳои саҳроӣ дар толори Қасри фарҳанги ноҳияи Ёвон бо фаъолони ноҳия вохӯрӣ доир намуданд.

Сараввал, раиси ноҳияи Ёвон Саидзода Ҷамшед Ҳамро аз бурду бохти соҳаҳои иқтисодиёт ва иҷтимоии ноҳия ба раиси вилоят ва ҳозирин гузориш дода, фаъолияти тамоми сохторҳоро мавриди таҳлил қарор доданд.

Раиси вилоят Қурбон Ҳакимзода баромад намуда, аз дастуру супоришҳои Сарвари давлат ёдовар гардида, иброз доштанд, ки зимни таҳлилу санҷишҳои соҳаҳои мухталифи ноҳия як қатор камбудиҳо ошкор гардидааст, ки бояд онҳо сари вақт бартараф карда шаванд. Ҳамзамон, раиси вилоят аз супоришҳое, ки дар амал татбиқ нагардидаанд изҳори нигаронӣ намуданд.

- Дар давоми нуҳ моҳи соли 2022 ҳаҷми маҷмӯи маҳсулоти дохилии ноҳия ба 2 млрд. 520 млн, 819 ҳазор сомонӣ расонида шуд, ки ин нисбат ба ҳамин давраи соли гузашта 176 млн, 604 ҳазор сомонӣ зиёд аст. Ҳаҷми истеҳсоли маҳсулоти саноатӣ ба 1 млрд. 251 млн. 263,8 ҳазор сомонӣ ва маҳсулоти кишоварзӣ ба 1 млрд. 269 млн. 555,2 ҳазор сомонӣ баробар гардид. Дар қиёс бо ҳамин давраи соли гузашта ҳаҷми маҳсулоти саноатӣ бо нархи муқоисавӣ 93 млн. 948,2 ҳазор сомонӣ зиёд (108,1%) ва ҳаҷми маҳсулоти кишоварзӣ нисбат ба ҳамин давраи соли гузашта (бо нархи ҷорӣ) 82 млн. 655,5 ҳазор сомонӣ зиёд (107%) мебошад, - гуфт раиси ноҳияи Ёвон Саидзода Ҷамшед Ҳамро.

Ба қавли раиси ноҳия дар ҳама бахшҳои хоҷагидории ноҳия ҳаҷми умумии маҳсулоти кишоварзӣ ба 1 млрд. 269 млн. 555,2 ҳазор сомонӣ расонида шуд, ки нисбати ҳамин давраи соли гузашта 82 млн. 655,5 ҳазор сомонӣ зиёд буда, суръати афзоиш 107,0 фоиз мебошад. Имсол дар ноҳия 9 ҳазору 716 га кишти такрории зироатҳои кишоварзӣ ба нақша гирифта шудааст, ки аз он 5 ҳазору 187 га ба хоҷагиҳои деҳқонӣ ва 4 ҳазору 529 га ба хоҷагиҳои аҳолӣ тааллуқ дорад. Ба ҳолати 1 октябри соли ҷорӣ дар ҳамаи бахшҳои хоҷагидорӣ 9 ҳазору 719 га кишти такрории зироатҳои кишоварзӣ гузаронида шудааст, ки ин баробари 100,0 фоизи дурнаморо ташкил медиҳад.

Дар охир раиси вилоят Курбон Ҳакимзода таъкид намуданд, ки корҳои ободонӣ дар иншоотҳои ҷашнӣ тезонда шавад. Ҳамзамон, дар амалӣ шудани иқдомоти мазкур қабл аз ҳама роҳбарон, шуруъ аз раиси ноҳия то сардорони ташкилоту муассисаҳо намунаи ибрат бошанд.

Масъулон вазифадор гардиданд, ки дар самти иҷрои дастуру супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон масъулияти бештар ҳис карда, барои расидани мардум ба зиндагии шоиставу арзанда мусоидат намоянд.

“Хатлон”