Дар як сатр
» » Хизмат кунӣ, ба қадри падару модар мерасӣ!

Хизмат кунӣ, ба қадри падару модар мерасӣ!

21-02-2015, 10:46

Хизмат кунӣ, ба қадри падару модар мерасӣ!

Қисми ҳарбии мустақар дар ноҳияи Бохтари вилояти Хатлон, ки солҳои 90-уми асри гузашта ба хотири фурӯ нишондани муноқишаҳо ва барқарор кардани сохти конститутсионии давлат таъсис ёфта буд, ҳамакнун барои наваскарон ба беҳтарин боргоҳи тарбияи ҳарбӣ-ватандӯстӣ ва шуҷоату мардонагӣ табдил ёфтааст.

Шароит дар хизмат чӣ гуна аст?
Хизмат кунӣ, ба қадри падару модар мерасӣ!– Солҳои 1993-94 дар инҷо дар ҳама самт камбудӣ буд, вале ҳоло хеле тағйир ёфтааст ва ҳатто яке аз беҳтарин қисмҳои ҳарбии мамлакат шудааст, - мегӯяд полковник Одина Тағоев, муовини командири қисми ҳарбии болозикр. - Шароити хизмат хеле хуб буда, сарбозон ҳамеша бо ғизои гуногун ва либоси мувофиқ таъминанд.

Дар тақвияти ин суханҳо сарбози қаторӣ Наимҷон Назриев, ки 5 моҳ қабл аз шаҳри Ваҳдат ба инҷо омадааст, гуфт, ки дар ҳақиқат кулли шароитҳо муҳайё аст. «Аз мо фақат пеш бурдани хизмати низомӣ тақозо мегардад», - афзуд мавсуф.

Дар ин росто, ба қавли лейтенанти калон Ҷамшед Исоев, қисми ҳарбӣ дорои маҷмааи фарҳангии бонизом низ мебошад. “Маҷмааи фарҳанг аз се қисм: китобхона, ҳуҷраи мусиқӣ ва маҷлисгоҳи дорои беш аз 250 ҷойи нишаст иборат аст. Барои омӯзиши мусиқӣ 8 адад сози миллӣ, мисли рубоб, дутор, думбура ва як-дуададӣ дойира, аккардион, таблак, найу карнай ва нағора мавҷуд аст.

- Китобхонаи мо дар мавзӯоти таърих, иқтисод, забон, варзиш ва ҳоказо ба забонҳои тоҷикӣ, русӣ ва ӯзбекӣ зиёда аз 4 ҳазор китоб дорад, - изҳор дошт мудири китобхона сарбози қаторӣ Мансур Расулов, сокини шаҳри Қӯрғонтеппа. – Ҳамарӯза 15-20 сарбоз ва аксари ҳайати роҳбарикунанда барои мутолиаи китобҳои дилхоҳашон ва рӯзномаҳои «Хатлон», «Ҷумҳурият», «Ҳомии Ватан» ва дигар ба инҷо меоянд. Китобхона таъмири замонавӣ дошта, бо рафҳои нави китобгузорӣ ва ҷой барои мутолиа таъмин аст.

- Барои муолиҷаи сарбозон дар мавриди зарурат дар қисми ҳарбӣ хадамоти тиббии муҷаҳҳаз амал мекунад, - баён намуд майори хизмати тиббӣ Тоҷиддин Имомов. - Барои 18 бемор бистар дорем. Аз анбори муттаҳидаи Вазорати мудофиаи кишвар ҳама дорувории лозимиро сари вақт мегирем. Азбаски ҳозир фасли зимистон аст, аскарон бештар баҳри табобати зуком муроҷиат мекунанд. Сафи беморон хеле кам аст. Ҳар пагоҳӣ зимни сафороӣ аз аҳволи сарбозон хабар мегирем. Агар касе бемор бошад, фавран ба муолиҷа фаро мегирем.

Ба ҷуз ин, дар ҳудуди қисми ҳарбӣ бемористони “Дӯстии Тоҷикистону Ҳиндустон” воқеъ буда, на фақат ба ҳарбиёни ҷумҳурӣ ва оилаҳои эшон, балки ба сокинони ғайринизомии вилояти Хатлон низ мадади тиббии ройгон мерасонад. Дар ин хусус сардухтури муассиса майори хизмати тиббӣ Урун Самадов чунин гуфт: “Дар ин ҷо аз табобати бемориҳои дарунию сироятӣ сар карда то ҷарроҳӣ гузаронида мешавад. Ва ҳамзамон дар Тоҷикистон ягона беморхонаи ҳарбиест, ки шуъбаи табобати амрози занона дорад. Барои муолиҷа 50 кат ва таҷҳизоти аксбардории рентгенӣ, ташхиси ултрасадоӣ ва лабораторияи ҳозиразамон фароҳам аст. Ду мошине, ки беморхона дорад, бо ҳама намуди фанновариҳои қиматтарини муосир таъмин буда, имкон медиҳанд, ки дар дохилашон ҷарроҳии хурд ва валодати тифл бе душворӣ гузаронида шавад”.

Хизмат кунӣ, ба қадри падару модар мерасӣ!Ба андешаи Неъматов, муовини командири қисми ҳарбӣ оид ба ақибгоҳ, хлебу ғизое, ки дар нонвою ошхонаи ин қисми ҳарбӣ таҳия мегарданд, таркиби вижа дошта, барои қавӣ мондани бозуву пайкари сарбозон таъсири амиқ мерасонанд. “Таъминот бо маводи ғизоӣ дар дараҷаи баланд аст. Дар дастархони аскарон асосан ширбиринҷ, нахӯдшӯрбо, марҷумакшавла, ҷавшавла, картошкаи майдашуда, ош ва дигар бо истифода аз гӯшти гов, гӯсфанд, мурғ, моҳӣ, сабзавоти очорӣ, шарбати олу ва зардолу гузошта мешавад”.

Хизмат кунӣ, ба қадри падару модар мерасӣ!- Ин гуна толори варзишии пур аз воситаҳои гаронарзиши тамрин дар хонаи ягон нафари мо нест, - гуфт сарбози қаторӣ Саид Раҳмонов, сокини шаҳри Исфара. - Варзишгоҳи бисёр хуб низ дорем. Ҳар рӯз машқ мекунем, ки аз ин ҳам ҷисмамон обутоб меёбад ва ҳам саломатиамон хуб нигоҳ дошта мешавад.

Тарс то аскар шудан аст
Ҳарчанд дар ин қисм ва дигар қисмҳои ҳарбии кишвар шароити мусоид муҳайёст, вале дар ҳамин солу замони осоишта то ҳол ҳодисаҳои сар печидан аз хизмати Ватан гоҳу ногоҳ ба мушоҳида мерасанд, ки ин боиси таассуфи амиқ аст. Ва мусаллам аст, ки зуҳуроти мазкур аз мувофиқи мақсад матраҳ нагардидани ғоя, нақша ва тадбирҳои идеологӣ дар миёни аҳли ҷомеа рӯ задан доранд. Дар ин росто, ҳайати роҳбарикунандаи қисми ҳарбии воқеъ дар ноҳияи Бохтар чӣ чорабиниҳоеро рӯйи кор овардаанд ва ҳамзамон дар ин хусус ҷузъе аз ҷомеаи ҷавони кишвар – аскарон чӣ назар доранд?

– Аввалан, мо бо мадади мутахассисони Вазорати мудофиаи кишвар, Прокуратура ва Суди ҳарбии гарнизони Қӯрғонтеппа суҳбатҳои тарбиявиро миёни сарбозон зиёд ба роҳ мондаем, то ин ки ҳамагуна муносибати ғайриойинномавӣ пешгирӣ карда шавад, - мегӯяд полковник Одина Тағоев, муовини командири қисми ҳарбӣ. – Зеро ҳатто дар оила ҳам ҳар кор шуданаш мумкин аст. Кӯшишҳои мо баръабас нарафтаанд. Муваффақ шудаем, ки муносибати ғайриойинномавиро, ки солҳои пеш аҳёнан вуҷуд дошт, аз байн барем. Ҳар ҳафта “Рӯзи дарҳои боз” дорем, ки дар он ҳангом аз шаҳру ноҳияҳои атроф мактаббачаҳо ва аз донишгоҳу коллеҷҳо донишҷӯён барои шинос шудан бо қисми ҳарбӣ ташриф меоранд, ки ин аз манфиат холӣ нест. Чунки вақтҳои пеш хоҳишмандони пайвастан ба сафи қувваҳои мусаллаҳ нисбатан кам буд. Аммо ҳозир миқдори ихтиёриён хеле афзудааст.

- Ҳозир саводи даъват-шавандаҳо ба сафи Қувваҳои мусаллаҳ хеле хуб шудааст ва бо ғайрат ба хизмат меоянд, - гуфт лейтенант Раҷабалӣ Сайфуллоев, командири взводи ротаи тирандози савораи баталони танкии қисми ҳарбӣ.

- Ман омадаам, ки хизмати Ватанро пеш барам, - баён кард сарбози қаторӣ Ҳайбулло Неъматов, сокини ноҳияи А.Ҷомӣ. - То рӯзи ба хизмат омадан дар дили ҳар як нафар ҳарос аст, вале ман, ки шавқ доштам, баъди хатми мактаб бо хоҳиши худ ба хизмат омадам. Ҳозир ҳеҷ тарсе дар дил надорам. Дар хизмат задан нест. Бачаҳо, биёед, хизмати Ватанро адо кунед. Тарсатон беҳуда аст.

Шерзод Валиҷонов, сарбози қаторӣ, сокини ноҳияи Ҷаббор Расулов: «Хидмат зӯр аст. Ман баъди адои он дар сохторҳои ҳарбӣ кор карданиам».

Раҳмонов Саид, сарбози қаторӣ, сокини шаҳри Исфара: «То анҷоми хизмати ман 1 солу 6 моҳи дигар мондааст, вале то ҳол хона рафтан намехоҳам. Хубии хидмати аскарӣ дар ин аст, ки падару модарро ёд мекунӣ, ба қадрашон мерасӣ. Ва баъдан, каси хизматкарда аз хизматнакарда аз бисёр ҷиҳат фарқ мекунад».

Сарбози қаторӣ Холмумин Алимхонов, истиқоматкунандаи ноҳияи Данғара: «Як солу чор моҳ мешавад, ки ин ҷо хизмат мекунам ва ягон мушкилот надорам. Ман аз хурдӣ ба хизмати аскарӣ ҳавас доштам ва ҳоло рутбаи сержант гирифтам».

Сарбози қаторӣ Раҳимов Хушбахт, сокини шаҳри Конибодом: «Шаш моҳ пеш ба хонаамон барои дидорбинӣ рафтаму зиқ шуда, зуд баргаштам. Зеро дар ин ҷо дӯстони ҳақиқие дорам, ки 24 соат дар барам ҳастанд. Яъне якҷо хӯрок мехӯрем, якҷо машқ мекунем. Аз ҳама гӯшаи Тоҷикистон ҷамъ 29 рафиқ дорам».

Сарбози қаторӣ Хушбахт Лолаев, нонпази қисми ҳарбӣ, сокини ноҳияи Шаҳринав: «Ман аз нонпаз буданам шарм намекунам. Зеро хизмат мактаби мардони ҳақиқӣ аст. Ифтихор мекунам, ки барои ҳамхизматон ҳар рӯз хлеби гарму лазиз пешкаш мекунам».

Сарбози қаторӣ Гулмурод Холмуродов, истиқоматкунандаи шаҳри Қӯрғонтеппа: «Хизмати аскарӣ, аввалан, барои муҳофизати Ватан зарур аст. Ва баъдан, чун аз падару модар дур ҳастӣ, мефаҳмӣ, ки онҳо чӣ саҳме дар зиндагият доранд ва ба қадрашон мерасӣ. Бачаи гапногир набудам, вале аз ин баъд гапашонро боз ҳам бештар мегирам».

Хизмат кунӣ, ба қадри падару модар мерасӣ!Сарбози қаторӣ Наимҷон Назриев, сокини шаҳри Ваҳдат: «Вақте ба ин ҷо омадем, командиронамон дар бораи хизматҳои худашон, дар бораи ҷанг нақл карданд, меҳри мо, шавқи мо нисбат ба Ватану ватандӯстӣ хеле зиёд шуд. Ва мо фаҳмидем, ки Тоҷикистони азиз ба мо - ҳомиёнаш ниёз дорад. Ва чуноне пешвои мо Ҷаноби Олӣ Эмомалӣ Раҳмон мегӯянд, бедорхобии мо як қадам ба сӯйи шукуфоии Ватан задан аст. Барои ҳамин, кӯшиш мекунам, ки ҳеҷ гоҳ савганди ҳарбиро нашиканам. Гуфтаниям, ки хизмат шараф аст ва то онро анҷом надиҳӣ, моҳияти аслиашро намефаҳмӣ ва ба қадри Ватан, модар, падар ва дигар неъматҳои рӯзгор намерасӣ».

Салом аз аскарӣ
Дар ин ҷойи матлаб ба сарбозони шуҷои қисми низомие, ки меҳмонаш будем, минбар додем, то ба пайвандону рафиқон дуруд бифиристанд.

Ҳайбулло Неъматов, сокини ноҳияи Абдураҳмони Ҷомӣ: «Падарҷон, модарҷон, доимо саломат бошед! Мо дар хизмати Ватанем».

Назриев Наимҷон, сокини шаҳри Ваҳдат: «Ба падару модар, бобову момоям изҳори миннатдорӣ мекунам, ки маро ба инҷо фиристоданд ва ман акнун хеле чизҳоро фаҳмидам. Баъдан, ба онҳо ва ёру рафиқонам саломи гарм мефиристам».

Ба ин паёмҳои самимӣ ҳамсуҳбатони дигари мо - Хушбахт Лолаев, Гулмурод Холмуродов, Мансур Расулов, Шерзод Валиҷонов, Саид Раҳмонов, Холмуъмин Алимхонов ва дигарон низ шарик ҳастанд.

Ба ҷойи хулоса
«Хизматчиёни Қувваҳои мусаллаҳ бояд, пеш аз ҳама, дорои ҳисси баланди ватандӯстӣ, интизоми қатъӣ, маҳорату малакаи ҳамаҷонибаи ҳарбӣ бошанд», - гуфтааст Эмомалӣ Раҳмон, Президенти Тоҷикистон. Ба андешаи инҷониб, ағлаби чунин сифатҳо дар қисми ҳарбие, ки мо барге аз фаъолияташро манзур намудем ва дар ҳама ҷузъу томҳои неруҳои мусаллаҳи кишвар ҷой дорад. Пас, месазад, то мо – шаҳрвандон барои дар фазои орому осуда кору зиндагӣ кардан аз якояки ишон сипосгузор бошем ва дуогӯйи устувории сулҳу амният дар Тоҷикистони маҳбубамон бошем.

Зокир ҲАСАН


Шарҳи хонандагон +

Матолиби дигар:

Аскарӣ мактаби мардонагист

Аскарӣ мактаби мардонагист

Хабарҳо, Ҷавонон ва варзиш, Номаҳои Шумо
Ҷавонони шуҷоъ ба хизмати Ватан мераванд

Ҷавонони шуҷоъ ба хизмати Ватан мераванд

Фарҳанг ва адабиёт, Хабарҳо, АМОН МАҲКАМОВ
Оғози маъракаи даъвати аскарӣ

Оғози маъракаи даъвати аскарӣ

Хабарҳо, Ҷавонон ва варзиш, ҲАНГОМА ПАҲЛАВОНОВА
Нишони ҷавонмардӣ

Нишони ҷавонмардӣ

Ҷавонон ва варзиш
Сарсупурдаҳои Ватан

Сарсупурдаҳои Ватан

Ҷавонон ва варзиш, ҲАНГОМА ПАҲЛАВОНОВА