Марди хираду омӯзгори асил

Муаллим  ва  омӯзгор  –  вожаҳое ҳастанд,  ки  барои  ҳар  инсон  азизу  муқаддасанд.  Дар  мафҳуми ин  калимаҳои  пуршараф  шахсе таҷассум меёбад, ки ба инсон илму дониш, адабу ахлоқ меомӯзонад. Муаллим  шахсияти  бузурге  мебошад, ки аз айёми кӯдакӣ роҳнамои инсон буда, ӯро ба сӯи камолот раҳнамун месозад. Ӯ дар баробари падару модар  меҳрубону  ғамхор  аст  ва  шогирдонро  ба  олами  маърифат  ворид мекунад.

Устоди гиромӣ Абдурасул Эшбекович Сатторов аз хонадони қаҳрамони меҳнат, шахсияти фозил ва муътабари ҷомеа – Эшбек Сатторов буда, 18-уми марти  соли  1950  дар  ноҳияи  Дӯстӣ  (Ҷиликӯл)  ба дунё омадааст.

Доктори  илмҳои  педагогӣ,  профессор  ва  Корманди  шоистаи  Тоҷикистон  устод  Абдурасул  Эшбекович Сатторов дар Донишгоҳи давлатии Бохтар ба номи Носири Хусрав фаъолият мекунад.

Аз  соли  1993  ӯ  дар  донишгоҳи  мазкур  дар вазифаҳои  гуногун  фаъолият  бурда,  муддати тӯлонӣ  ба  пешрафти  илму  маориф  саҳми  арзанда  гузоштааст.  Аз  ҷумла,  ҳамчун  мудири  кафедраи  алгебра  ва  геометрия,  ноиби  ректор  оид  ба иқтисод ва ғоибона (1997-2002), ноиби ректор оид ба  илм  (2002-2005),  директори  маркази  компютерии донишгоҳ (2005-2007) ва аз соли 2007 то 2020 мудири  кафедраи  алгебра  ва  геометрия  кор  кардааст. Дар айни ҳол, ӯ дар ҳамин кафедра ҳамчун профессор фаъолият дорад.

Меҳнати  садоқатмандона ва  фаъолияти  пурсамари  устод дар рушди соҳаи маориф ва илм шоистаи таҳсину эҳтиром аст.

Профессор  А.Э.  Сатторов  ҳамзамон  бо  фаъолияти омӯзгориаш  таҳқиқоти  илмиро пайваста идома дода, соли 2011 рисолаи  доктории  худро  таҳти унвони  “Ақидаҳои  дидактикии олимони  асримиёнаи  шарқи наздик  ва  миёна  ва  истифодаи онҳо  дар  раванди  таълими  математика”  бо  муваффақият  дифоъ  намудааст.  Аз  соли  2012 инҷониб  ӯ  ҳамчун  профессор фаъолият мекунад.

устод  бо  маърӯзаҳои  илмии  худ  дар  конфронсҳои байналмилалӣ  ва  ҷумҳуриявӣ фаъолона  иштирок  менамояд. 

Натиҷаи  заҳматҳои  пайвастаи ӯ бештар аз 30 китоби дарсӣ ва дастурҳои методиро дар бар гирифта,  наздик  ба  400  мақолаи илмӣ,  илмӣ-методӣ  ва  илмӣ-оммавӣ  ба  қалами  ӯ  тааллуқ дорад.  Баъзе  аз  асарҳои  ӯ сарҳадоти  кишварро  убур  намуда, дар давлатҳои хориҷӣ, аз ҷумла  Русия,  Чехия,  Словакия, Полша,  Ӯзбекистон,  Қазоқистон ва дигар кишварҳо ба нашр расидаанд.

Қобили  зикр  аст,  ки  устод аз соли 2022 раиси шурои диссертатсионии 6Д.КОА-048 назди Донишгоҳи  давлатии  Бохтар  ба номи  Носири  Хусравро  ба  уҳда дошта,  дар  рушду  пешрафти илм  саҳми  назаррас  мегузоранд. 

То имрӯз зиёда аз 10 шогирдони устод рисолаҳои номзадӣ ва доктории худро бомуваффақият дифоъ намуда, ҳамзамон гурӯҳи зиёди дигар таҳқиқоти илмии худро дар самтҳои гуногун идома дода истодаанд.

Боиси  ифтихор  ва  шукргузорист,  ки  устод  дар  авҷи  камолоти  фикрӣ  ва  эҷодӣ   қарор дошта, бо иродаи қавӣ ва нерӯи тоза ба фаъолияти илмӣ идома медиҳанд.  Итминон  дорем,  ки дар  оянда  низ  таълифоти  арзишманду нодири эшон ба илму маориф хизмат хоҳад кард.

Олими  шинохта  ва  донишманди  варзида,  профессор А.Э. Сатторовро ба муносибати 75-солагии  зодрӯзашон  самимона  табрику  таҳният  гуфта, ба  эшон  умри  дароз,  салома-тии  бардавом,  саодатмандӣ  ва комёбиҳои  нав  ба  нав  таманно 
дорем.

Имомалӣ Абдуллоев, 
омӯзгори коллеҷи  омӯзгории шаҳри Бохтар